THUNGKAM U VC NEHU ÏA U BAR JYLLA KHLEM KHOT ADVERTISEMENT, SIEW TULOP 75 HAJAR SHI BNAI
Shillong, Risaw, 26: Ki nonghikai jong ka skulbah NEHU kiba don hapoh ka shatri jong ka North Eastern Hill University Teachers Association (NEHUTA) bad ki samla pule kiba don hapoh ka shatri jong ka North Eastern Hill University Students Union (NEHUSU) ha ka sngi Palei ki la dawa ban wengkam noh mardor ia u Rohit Prasad ia uba la shu thungkam hi da u Vice Chancellor ka skulbah NEHU u Prof. PS Shukla hapoh ka ophis treikam ka jong u kum u Technical Advisor khlem da khot ia ka Advertisement, khlem da pynlong ia ka interview bad khlem da iaid katkum ki kyndon treikam jong kane ka skulbah.
Ki samla pule kiba pyrshah ia kane ka jingthungkam sopsop jong u Prof. Shukla ki la kerkut ia ka ophis treikam jong u da kaba pynlong ia ka jingïakhih bad pyrta shla hakhmat ka ophis treikam bad dawa ba dei ban wengkam mardor ia u Rohit Prasad bad ban pynurlong ia ki mat jingdawa ba ki samla pule jong kane ka skulbah ki la iakynduh bun ki jingeh.
Ha ka jingiakren bad ki lad pathai khubor, u President jong ka NEHUSU u samla Ready First June Nongbsap u la pynpaw ka jingsngewsih halor ka jingphet jong u Vice Chancellor u Prof. PS Shukla na ka kamra treikam tang shu ioh jingtip ba ki samla pule kin pynlong ia ka jingïakhih ban pynsngew halor ki mat jingdawa jong ka Union.
Katkum ka jingiathuh jong une u nongialam ka NEHUSU, u Rohit Prasad u ioh ia ka jingsiew tulop kaba T.75 hajar shi bnai, nalor ka TA/DA bad ka Quarter.
Haba iathuh ia ki mat jingdawa u la ong, “ka jingdawa ka long ban ai ia ka bam ka dih kaba bha sha ki samla pule kiba sah Hostel, ban pynbiang ia u Wifi bad ban pynthikna ruh ba ki samla pule bad kiba sah hapoh ka NEHU Campus kin don hapdeng ka jingshngaiñ.
U la iathuh ba NEHUSU ka la dawa ban pyntreikam pura ia ka School of Technology (SoT) khnang ba ki samla pule kin dup ioh jingmyntoi na ka jingdon jong ka Library.
“Ngi dawa ruh ia ki bor pyniaid ban pynthymmai ia ki kor computer ha ki Laboratories khnang ba ki samla pule kin dup lah ban kham pyntbit shuh shuh ialade ha kaba leh ia ki jingwad bniah,” la ong u nongialam ka NEHUSU bad bynrap, “ngi dawa ruh ba ki bor pyniaid ka skulbah NEHU ban wanrah ia ka Marking System kaba khuid ba suba.”
Haba bynrap halor kane, u President jong ka NEHUTA, u Prof. Lakhon Kma u la ong, ba ka Joint Action Committee (JAC) kan ai por haduh ka por 12 baje mynmiet jong ka 26 tarik, Risaw, 2023 ban wengkam mardor ia u Rohit Prasad hynrei lym kumta ka Joint Action Committee kan pynlong da ka jingïakhih hakhmat ka ophis treikam jong u Vice Chancellor. U la iathuh ruh ba ka JAC ka la dawa ruh ia u Prof. PS Shukla ban pyndam noh mardor ia ka post Campus Director ba la thung hapoh ka Tura Campus hynrei ban thung beit da u Pro. Vice Chancellor kumba ju long hi ka rukom katkum ki kyndon treikam jong ka skulbah NEHU.
