YN PHAH DORKHAS KA CAS SHA KA DROUPADI MURMU BAN WANRAH JINGSUK HA MANIPUR
Shillong, Nailar, 03: Ka Catholic Association of Shillong (CAS) ha ka sngi Palei ka la khot bad wer ia ki paidbah nongshong shnong jong ka nongbah Shillong bad kumjuh ruh ia ki parabangeit jong ka Balang Catholic bad ia ki parabangeit jong ki kynhun jait niam bapher bapher ban iashim bynta lang ha ka Peace Rally na ka bynta ka jingsuk ha ka Jylla Manipur ka ban sa long ha ka 5 tarik mynta u bnai naduh ka por 10:00 baje mynstep ka ban sdang na madan Iewrynghep bad ban pynkut ha Don Bosco Mini Stadium, Laitumkhrah, Shillong.
U President ka Association u Bah J.A. Lyngdoh ha ka jingiakren bad ki lad pathai khubor u la iathuh ba ha kane ka sngi, yn sa pule ia ka dorkhas ban sa phah sha ka President jong ka ri ka Droupadi Murmu lyngba u Lat ka Jylla Meghalaya u Phagu Chauhan ba kan tuklar lem halor ka jingiaumsnam bad ban wanrah biang ia shongsuk shongsaiñ ha ka Jylla Manipur.
“Lai bnai kynthih ki sngi ki la iaid naduh ba la jia ka jingiaumsnam ha ka jylla Manipur. Palat 50 hajar ngut ki briew ki la im khlem ing khlem sem, palat 10 hajar ki iing ki la shah pynjulor bad shah wiang ding. Palat 500 tylli ki jaka mane Blei ki la shah pynjot pynpra. Da ki spah ngut ki mynsiem briew ba luilui ki la duhei ia la ka jong ka jingim na ka jingiaumsnam. Wat ia kiba pang ba shitom, ki riewtymmen, ki khynnah bad ki kynthei ruh ym shym la map. Ia ki kynthei la pyniaid lyngkhuit hakhmat u paidbhur,” la ong u President ka CAS.
“Ka jingiakynad jaidbynriew kam dei shuh ka jingjia kaba dang thymmai ha ka thaiñ Shatei Lammihngi hynrei ka jingiakynad kaba la jia naduh ka 3 tarik, Jymmang, 2023 ka la kham palat ban ia ki jingjia kiba ladep,” u la ong.
“Ngi duwai ba ka jingsuk kan wanphai biang ha ka jylla Manipur. Ngi la lum ia u synñiang ban phah sha ki lanot kiba sah ha ki ktem sah shipor,” la ong u President ka CAS.
“Haba jia kum kine ki jingiaumsnam ngim lah ban shu sngap jar bad ban shu long tang ki nongpeit kai. Ngi hap ban kren eiei ia ka jingisih, ia ka jingiashun niam, ka jingpynjulor bym don shuh ka mynsiem iatip lem ia ki ing ki sem bad ki mar ki mata bad ka jingthwet ban dkhat jubor ia ki jingim briew,” ong u Bah JA Lyngdoh.
“Namarkata, ngi kyntu ia ki kynhun bapher bapher ha ka jylla Manipur ba kin wan sha ka miej jingiakren iasuk. Ai ba ki nongialam kin sdang ia ka jingiakren. Dei tang kane ka lad kaba ngi khmihlynti ban sdang thymmai biang sa shisien pat. Ngi donkam ia ka jingsuk, ngi kwah ia ka jingshongsuk shongsaiñ,” u la bynrap.
Ha kaba iadei bad kane, ngi khot bad wer ia ki nongshong shnong kiba ieid ia ka shongsuk shongsaiñ ban iasnohkti lang ha ka jingiaid rally ba jar jar na ka bynta ka jingsuk ha ka jylla Manipur, ong shuh shuh u Bah Lyngdoh.
“Ngin sa pynlong ka jingduwai kaba kyrpang ha kane ka sngi na ka bynta ka Jylla Manipur bad ngi la khot ruh ia kiwei ki jait niam bapher bapher ban iashim bynta lang ha kane ka sngi,” u la ong bad bynrap, “ngi kyrpad ia ki nongiashim bynta ban kiar katba lah ban rah ia ki jingthoh ha ki plakad bad ki banar ia ki jingthoh kiba ai ding bad kiba kynshoit.”
Ka CAS ka la pyntip ruh ba ki nongiashim bynta ha ka rally ki lah ban pynieng ia ki kali ha phyllaw ka St. Edmunds School, St. Edmund’s College, Monreau Institute of Integral Training, Holy Cross Father, Brookdene, Loreto Convent School, ha phyllaw ka Ingmane Cathedral bad ha madan phulbol, ha Christ King College, St. Anthony’s College, Shillong, ha phyllaw ka St. Marys School, ha phyllaw ka St. Margaret’s School.
