Khliehriat, Naiwieng, 20: Ki Pulit jong ka East Jaiñtia Hills District ha ka 20 tarik u Naiwieng, 2023 ki la ioh kurup 4,135 bilor ka dawai Phensydel kiba don ia ka dawai kaba 100 ml ha manla uwei pa uwei u bilor ba la kit be-aiñ da kawei ka trok kit umphniang Diesel kaba don ia u nombar NL-01-AH-2246.
Ki Pulit ki la kem ia u Shakeep Sheik uba dei na ka jylla Maharashtra bad register case hapoh ka Khliehriat Police Station hapoh ka Section 279/337/338/427 Indian Penal Code pule lang bad ka Sec 22(c)/29 jong ka NDPS Act khnang ban buddien shuh shuh halor ka jingioh kurup ia kine ki dawai.
U Superintendent of Police jong ka East Jaintia Hills District, u Jagpal Singh Dhanoa ha u kyrwoh ba la phah sha ki lad pathai khubor u la iathuh ba ha ka sngi Thohdieng jong ka taiew baladep, ki Pulit ki la ioh jingtip ha ka por kumba 6.30 baje mynstep ba ka don kawei ka trok kit umphniang kaba la thung khongpong ha kawei ka riat kaba jylliew ha ka shnong Umtyra bad ia u nongñiah jong ka trok uba la sahkut hapoh ka Cabin jong kane ka trok ia uba la tip kyrteng kum u Shakeep Sheik la ioh sei bad la pynkit mar mar sha ka jaka ai jingsumar ha Civil Hospital, Khliehriat.
Ha ka jingtohkit, une u nongñiah jong ka trok u la kam ba ka trok ka dei kaba kit ia ka umphniang Diesel bad ia ki kot ki sla jong ka kali la lap na ka Cabin ba shong u nongñiah trok. Hadien ba la tohkit ia ki kot ki sla, ka kyrteng jong u trai kali bad ka jaka sah ki iapher katkum kaba paw ha ka e-challan App.
U SP u la iathuh ba ki Pulit ki la tohkit na ka Bharat Petroleum Transport Office, ha kaba la lap ba kane ka kali kam shym la kit satia ia ka umphniang (diesel) na ka karkhana bad kam don satia kano kano ka jingbuh jingthoh kaba don hapoh ka ophis jong ki bad kane ka la pynsuba sniew ia ki Pulit.
Shuh shuh u SP, u la iathuh ba ka 20 tarik mynta u bnai, ki Pulit ki la talasi ia ka trok bad ia ki bynta ba shapoh jong ka top umphniang ha kaba ki la lap ia kaei re kaei kaba la buhrieh hapoh ka Chamber jong ka top umphniang. Marmar la khot ia ki nongsakhi sha ka jaka ba don ka trok bad da ka jingiarap jong ki nongot la lah ban weng ia ki nar jong ka top umphniang na ka Chamber ha kaba la lap pynban ba la thep ia ki dawai bilor Phensedyl.
“Haduh 4,135 tylli ki bilor dawai Phensedyl la ioh ban kurup kiba dap da ka dawai 100 ml,” ong u SP bad bynrap, “hadien ba la pyndep ia ki jingtohkit katkum ka NDPS Act la kurup noh ia ka dawai.”
