Shillong, Lber, 7: U Myntri Rangbah ka Jylla u Conrad K. Sangma ha ka sngi Palei u la aiti ïa ki shithi thungkam sha ki 425 ngut ki doktor ba dang shu rung kam thymmai bakynthup ïa ki Junior Specialist, ki Medical Officer bad ki Dental Surgeon kiba shakri ha ki jaka ai jingsumar bapher bapher ka Jylla.
Ïa ki shithi thungkam la aiti ha ka jingïalang kaba la long ha State Convention Centre, Shillong ryngkat ka jingsakhi lang jong ka Myntri ka Koit ka Khiah ka Dr. Ampareen Lyngdoh bad u Myntri ka tnat PHE u Marcuise N. Marak.
Haba ai khublei ïa kine ki doktor, u Myntri Rangbah u la kyntu ïa ki ban long kiba trei shitom ïa ka kam khnang ba kin dup lah ban ai ïa ka jingshakri bapaka ïa ka imlang ka sahlang.
“Ïa ka jingthungkam la pynlong da ka Sorkar ha ka lynti kaba khuid. Phi don hangne namarba phi long kiba tbit bad phi la leh bha ïa ka eksamin,” u la ong.
U Myntri Rangbah haba pynshai ïa ki jingeh halor ka jingthungkam ha ki tnat treikam ka Sorkar u la ong, “ngi la pynïakhlad ïa ka jingpynrungkam da kaba thaw ïa ka Board na ka bynta ka pule puthi bad ka koit ka khiah, kaba la pynsuk ban treikam. Ha ki snem baladep, ka jingthungkam ka long kaba suki bad ki don ki khep, ka shimpor wat haduh hynriew snem. Ka rai ban thaw la ka jong ka Recruitment Board na ka bynta ka pule puthi bad ka koit ka khiah ka long ban pynstet ïa ka jingthungkam bad ban pyndap kham kloi ïa ki kam ba thylli.”
Ha kaba ïadei bad ka jingpynkhlaiñ ïa ka tnat ka Koit ka Khiah, u Sangma u la ong, ha kaba ïadei bad ka Percentage, la buh hakhmat eh ïa ka Koit ka Khiah kaba long 8 percent na ka mang tyngka jong ka Sorkar. “Ka mang tyngka na ka bynta ka tnat ka Koit ka Khiah ka dei kaba heh tam ha ka ri, namarba ngi angnud ban pynkhlaiñ bad ban pynthymmai ïa ka tnat ka Koit ka Khiah,” u la bynrap.
“Ki don ruh ki jingtynjuh kiba ap ïa ngi hakhmat, hynrei ngi hap ban ïakhun la ka long ha kano kano ka dur, ngin ïai bteng ban pynjanai ïa ka koit ka khiah ha ka jylla,” u la ong shuh shuh.
Shuh shuh u la ïathuh ba la tei ïa ki Administrative Housing Unit ha kylleng ka jylla na ka bynta ki nongtrei jong ka tnat ka Koit ka Khiah bad kiwei kiwei. Ka jingshna ïa ki jaka treikam wat sha ki jaka ba kyndong tam jong ka jyllaka long ba ki nongtrei Sorkar kin dup lah ban ai jingshakri lang kumjuh. “Ka Sorkar ka la shna da ka Complex ban pynsah lang ïa ki doktor, engineer, bad kiwei kiwei ki nongtrei sorkar hapoh kajuh ka tnum ing, u la ong.
U Sangma u la ïathuh nalor ki District Headquarter ban sa shna ïa ki Administrative Housing Complex, yn sa shna ruh ïa kine ki ing sha ki jaka ba kyndong na ka bynta ki doktor, ki nurse bad kiwei kiwei ki nongtrei jong ka Sorkar.
“Ngin ym lah ban shu pyntreikam noh mynta mynta ha baroh kawei ka jylla hynrei ka sorkar ka la kut jingmut ban sdang tei noh shen ïa ka Housing Complexe,” la ïathuh u Sanmga.
U la pyntip ruh ba ha ki khyndiat snem ban sa wan, yn sa shna pynbha ïa ki PHC bad CHC kynthup ruh ïa ki Hospital.
U la ïathuh ba ha ki khyndiat taïew ban sa wan, yn sa plie paidbah ïa ka Patient Management System ha ka jylla khnang ban peitngor ïa ka jinglong jingman jong ki nongpang kiba shah sumar ha ki jaka sumar bapher bapher ka jylla.
“Ngi la leh ïa ka pilot project ha Ribhoi district bad ïa kane ngin sa leh ruh sha kiwei ki jylla,” la bynrap u Sangma.
