Shillong, Lber 7: U General Secretary ka Khasi Students Union (KSU) ha ka sngi Balang u la plie paidbah ia ka Maitshaphrang Fitness Centre hapoh ka shnong Mawïongrim ia kaba la pynbit pynbiang da ka KSU Mawïongrim Unit.
Ha kane kajuh ka sngi, une u nongialam ka seng u la pynskhem ruh ia ki nongkitkam ba thymmai jong ka KSU Mawïongrim Unit na ka bynta ka samoi treikam jong u snem 2024-2027
Ha ka jingplie ia kane ka jaka kilan met la sakhi lang u Vice President samla Biangbor L.Paliar, u Sports Secretary samla Eric Nongkynrih, u Assistant secretary ka Mawlai Circle u samla Donboklang Sawkmie, Assistant Finance Secretary samla Robert khongsit bad kiwei kiwei.
Haba ai jingkren sha ki nongkitkam bathymmai jong ka shnat treikam ka KSU Mawiongim Unit u Samla Donald Thabah u la kren shaphang ka jingiohrung ki mynder lyngba ka shongkha shongman bad ka jingleh Benami ki trai ri trai muluk kaba pyniohlad ban buhai shnong bad ban khaii laitluid ha kane ka jylla.
U la banjur ruh ia ka jingkynrei stet u drok ha manla ki kyndong kynshrot ha ki jaka ba don tang para Khasi bad ka lah ban dei ka jingleh jongno re kiba kwah ban pynngop ia ki samla Khasi ha une u jingdih ba shyrkhei khnang ba ki samla Khasi kin troiñ ha baroh ki liang.
U la kyntu ruh ia ka Mawïongrim Unit ba ki dei ban peitngor bha ia ka iaid ka ieng ki mynder kiba ju iaid manla ka khyllipmat na ka surokbah kiba ym lah ban tip ioh ki dei kiba wan leh ki kam sniew laiphew jait ban pynsniew dur ia ka imlang ka sahlang ha kane ka Jylla.
