Shillong, Naitung 30: Ka KSU lyngba ka Employment Monitoring Cell, ha ka sngi baar ka la leit buh da ka dorkhas ha u Chairman bad Secretary jong ka MPSC haba iadei ba ki kynrum kynram kiba mih ha kine ki khyndiat sngi halor ka eksamin thungkam na bynta ka MCS, MPS bad Statistical Officer.
Halor kane na ka liang ka KSU ka la pynpaw ba kam sngew ïahap satia ïa ka jingpynshai na ka liang jong ka MPSC kaba la mih ha ki lad pathai khubor ha ka 26.07.2024 ha kaba ka la pynksan ïa ki jingleh thurmur jong ka khlem da sngewkhia ba ki ïalehkai bad ka jingim ki samla ka jylla.
Haba kren bad ki lad pathai khubor ha ka sngi baar u Chairman ka Employment Monitoring Cell ka KSU U Bah Reuben Najiar u la ong ba ka Seng, ka la dawa na ka MPSC ban pynlait paidbah ïa ki marks jong baroh kiba ïaleh ïa ka MCS (prelims) examination khnang ba ki nongïaleh eksamin kin shai halor ka jingshah jied bad shah kyntait ka jong ki na bynta ka eksam jong ka Mains. U la ong ruh ba ka seng ka dawa ban thung ïa ka jingtohkit kaba laitluid ne ka “Independent Inquiry” ha kaba ïadei bad kane ka bynta.
“Ka seng ka daw ruh ban pynshai halor ka jingduna ki samla kiba shah jied ha ka personal interview jong ka MPS, naba katkum ka advertisement jong ka MPSC, ka pyni ba yn jied ïa ki samla sha ka personal interview katkum ka ratio 1:10 haduh 1:2.5 na ka post ba lait, namar ba pynlait ïa 17 tylli ki post ha u snem 2019, kumta ba duna tam ban shah jied ha ka personal interview kan dei 42 ne 43 ngut, hynrei la ïohi ba ki jied tang 27 ngut bad kane ka la pynkheiñ ïa ka kyndon kaba ka MPSC hi ka lah buh. Kumta ka seng ka buh ka dak jingkylli ba shaei kita ki 15-16 ngut ki samla ki jah bad kim shym lah ban mih kyrteng na bynta ka personal interview,” ong u Bah Najiar.
U la ong ba ha kaba ïadei bad ka resol jong ka Statistical Officer, A.H Veterinary la ïohi ba ka la jied ïa 2 (arngut) ki samla, iwei na ka Khasi-Jaiñtia category bad uwei na ka Garo category katkum ka notification ba lah pynlait ha 27.06.2024. “Hynrei kaba sngew lyngngoh ka long ba katkum ka advertisement ba la pynmih ha ka 14.12.2020 pat, ka jinglaitkam ka dei tang na bynta 1 (kawei) ka post bad ïa kane la pynskhem biang da ka Corrigendum ba lah mih ha ka 14.09.2022 kaba dei beit thik tang ïa kawei ka post na bynta Khasi-Jaiñtia category,” u la bynrap.
U Bah Najiar u la ong ba ka Seng ka la buh ka jingmaham ïa ka MPSC ba lada kam lah ban pynbeit ne pynshai halor kine ki bynta hapoh 48 kynta, ka seng kan shim ïa la ka jong ka sien jam.
