Shillong, Lber, 19: Ka National Health Mission ka Sorkar Meghalaya ha ka sngi baar ka la rakhe ia ka World TB Day 2024 halor ka phang, “Yes, we can end TB.”
Ha ka jingrakhe ia kane ka sngi, la iashim bynta lang da u Ramkumar S Mission Director ka NHM bad Secretary ka Health & Family Welfar, Dr. F. V. Kharshiing DHS, MCH&FW cum Joint MD, NHM, Meghalaya, Dr. J. Kharwanlang State Tuberculosis Officer bad Dr. B. Shanpru, District TB Officer East Khasi Hills, ki nongtrei jong ka R. P. Chest Hospital bad kiwei kiwei.
Haba kren ha kane ka sngi, u Ramkumar S u la ong ba ka Sorkar Pdeng bad ka Sorkar Jylla ki la buh hakhmat ia ka thong ban pynkut ia ka jingpang TB bad da kane ka thong la ai ia ka jingsumar kaba paka sha ki paidbah. U la ong ba dei ruh ban shimkhia bha ia ka jingpang TB bad ia kane ka jingpang yn sa lah ban pynkoit tang da ka jingsumar bapaka.
U la iaiban ruh ba donkam ban leh test ia ki briew kiba shong basah ha ki shnong nongkyndong bad ha kajuh ka por u la khot bad wer ia ki nongialam jong ka Village Health Council, ki nongsumar dawai kynbat, ki jaka ai jingsumar ba kin pynthikna ban pynkut noh ia ka jingpang TB ha ka jylla bad ha ka ri.
Ka State Tuberculosis Officer Dr. J. Kharwanlang ka la iathuh ba ki don 4974 tylli ki case jong ki briew kiba pang TB ha u snem 2022 bad 4812 tylli ki case ha u snem 2023. Ka jingleh test ia kiba suba don jingpang TB na ka bynta shi lak ka la kiew na ka 646 lak ha u snem 2021 sha ka 1433 lak ha u snem 2023. Ka bynrap, “watla ka jingleh test ia kiba suba don jingpang TB ka la kiew ar shah bad ka jingpyndonkam ban pyndonkam ia ka High Quality Diagnostic Tests, ka la hiar na ka 130 lak ha u snem 2022 sha ka 124 lak ha u snem 2023, kaba pyni ia ka jinghiar ka jingdon jong kiba pang TB ha ka jylla.”
Ha kane ka sngi, la plie paidbah ruh ia ka C&DST Lab ka ban ai jingkyrshan ban lap bad ban sumar ia ka jingpang TB.
Kum shi bynta ka jingpyntreikam ia ka National Tuberculosis Elimination Programme (NTEP), la plie ruh ia ki Regional Laboratory ha kylleng ka jylla. Ha kine ki Lab la leh ia ka Culture and Drug Susceptibility Testing (C&DST) na ka bynta kiba don jingpang TB bad na ka bynta ki nongpang Drug-Resistant TB.
