Shillong, Lber, 19: Ka Ingbishar Supreme Court ha ka sngi Baar ka la buh sngi ban shong bishar haduh ka 9 tarik, Iaiong 2024 ia ka jingujor jong ka North East Students Organisation (NESO) ban pynsangeh ia ka Rule jong ka Citizenship (Amendment) Act 2019.
Katkum u kyrwoh ba la phah da ka Khasi Students Union (KSU), ka Ingbishar Supreme Court ka la iaiban ia ka rai ba la pynmih dang shen ban shong bishar la ka jong ia ka jingujor na ka bynta ka jylla Assam, ka Tripura bad ka thaiñ Shatei Lammihngi nalor kiwei pat ki jingujor ba la ioh pdiang na ki bynta bapher bapher jong ka ri India.
Ka KSU ka la iathuh ruh ba ka Ingbishar Supreme Court ka la thung ruh ia u Ankit Yadav, uba dei u muktiar jong ka All Assam Students Union (AASU) bad ka North East Students Organisation (NESO) kum u Nodal Officer na ka bynta ki nongujor. Ka Ingbishar ka la bthah ruh ia ka Sorkar India ban ai jubab halor kine ki jingujor shwa ka 9 tarik, Iaiong, 2024.
Kum ban shu pyntip hangne, ki nongialam jong ka NESO ki la leit sha Delhi ban ujor halor ka jingpyntreikam ia ka Citizenship (Amendment) Rule, 2024 bad kyrpad ia ka Ingbishar ba kan pynsangeh noh mardor ia kane ka Rule ba la pynmih dang shen da ka Sorkar India.
