Shillong, ïaïong, 19: Kumba 50.23 percent ha Shillong Seat bad 46.67 percent ha Tura ki paidbah ki la leit ban thep ia ki vote ki jong ki ha ka sngi Thohdieng haduh ka por 1 baje nohsngi.
Ia kane la pyntip da u Chief Electoral Officer ka Jylla Dr. BDR Tiwari.
U Myntri Rangbah ka Jylla u Conrad K. Sangma uba long ruh u National President jong kaNational People’s Party (NPP) u la mih na la ing bad ñiah hi ia ka kali ban leit sha Polling Station ha Tura bad ieng ha u laiñ ban ap ia ka pali jin haduh kumba lai kynta eiei ban ioh thep ia ka vote.
U Myntri Rangbah uba la poi ha Walbakgre Polling Station ha ka por 6:30 mynstep u la hap ban ap ia la ka pali ban pyndep ia la ka jong ka kamram ban jied nongmihkhmat na Tura Parliamentary Seat.
Shuh shuh u Conrad Sangma u la iathuh ba u la pyllait ia ki Pulit pahara jong u, ia u nongñiah kali bad ia ki nongtrei kiba ju don ha syndah jong u khnang ban ailad ruh ba kin dup iohlad ban leit thep ia ka vote.
“Haba nga la poi ha Polling Station ha ka por kumba 6:30 baje mynstep, ki don lypa kumba 200 ngut ki briew kiba ieng laiñ ha Polling Station. Kane ka pyni ia ka khubor kaba bha ba ki paidbah ki iashim bynta ha ka jingthep vote ban jied nongmihkhmat,” u la bynrap.
Ka MP ba mynta ka Tura kaba long ruh ka kyrtong jong ka NPP ka Agatha Sangma ka la poi ha Walbakgre Polling Station ha ka por 7.30 baje mynstep ban thep ia la ka jong ka vote.
Ha ka jingiakren bad ki lad pathai khubor, ka Agatha Sangma ka la ong, “ngi sakhi ia ka jingmih ryntih jong ki paidbah bad ka jingbun ki paidbah kiba ieng ha u lain lada ianujor bad ka elekshon Assembly, kane ka pyni ia ki dak ki shin kiba bha. Nga pynshlur ia ki paidbah ba kin pyndonkam hok ia la ka jong ka iktiar. Ngi sngewnguh ruh ia ki paidbah kiba wan ban thep ia ka vote.”
Ka jingthep vote ha ka Phase-1 jong ka elekshon Lok Sabha ka la long ha ki 102 tylli ki Constituency ha kylleng ka ri India naduh ka por 7 baje mynstep bad ka ban kut haduh ka por 4 baje janmiet.
