Shillong, ïaïong 18: Ka Meghalaya Human Rights Commission (MHRC) ha ka sngi Palei ka la pan jubab na u Director General of Police ka Jylla halor ka jingshah tait shnong jong kawei ka longkmie ha ka Dorbar Shnong Lumlakhait, West Jaintia Hill District.
Katkum u kyrwoh ba la phah da u Secretary ka Commission, kane ka jingshimkhia jong ka Commission ka long hadien ba kane ka jingjia ka la mih ha kawei na ki kotkhubor Khasi ha ka 16 tarik mynta u bnai.
“Ka Commission ka la phah ia ka notis sha u Director General of Police, Meghalaya, ba un phah ia ka kaiphod kaba bniah hapoh 15 sngi,” la ong u Secretary ka Commission.
Ka Kong Meloris Dhar ka la shah tait shnong ha ka Dorbar Shnong Lumlakhait, West Jaiñtia Hills District halor ka jingkynnoh ba ka dei kaba don Taro.
Arngut kiba soi kyrteng ha ka ejahar ba la mudui sha u Superintendent of Police ka West Jaiñtia Hills District ba kynthup ïa u Thermonki Susngi na ka shnong Nartiang Mudop bad u Diamond Dhar na ka shnong Lumlakhiat ki la kynnoh da kaba pynpaw, “ka Dorbar Shnong ba la ïalam da u Waheh Shnong u Bah Edward Shadap bad u Secretary Shnong u Bah Tisis Phira ki la ai ka jingmynjur ha u Risaw, 2023 bad ha ka 5 tarik, Ïaiong, 2024 ban tait shnong ïa ki lai ngut ki briew kiba kynthup ïa u Biktor Dhar, Balen Dhar bad ïa ka Meloris Dhar.”
Ka jingmudui ka la pyntip shuh shuh, “ki la byrngem byrsit ïa ka ing ka sem bad ïa ka kur ka jait Dhar bad kim shah shuh ban leit trei leit ktah bad ban rep lyngkha ruh.”
“Ngi kyrpad ïa ka ophis ba donburom jong phi ba phin sngewbha ban shimkhia ïa kane, khnang ba ngin ïoh biang ïa ka shongsuk shongsaiñ ha ka iing ka sem bad ha ka shnong ka thaw ruh kumjuh,” la kyrpad ki nongujor ïa u SP.
Ha ka jingïakren bad u nongthoh khubor, u khun jong ka Kong Meloris Dhar u la ïathuh ba ka Dorbar Shnong Lumlikhait ka la pynmih ïa ka hukum ban beh shnong nyngkong eh ha ka 9 tarik Risaw, 2023 halor ka jingkynnoh don Taro tang namarba ki don ki briew kiba la ïohpang hapoh ka shnong Lumlikhait.
U la ïathuh ba ha kane ka dorbar, ki la don ruh ki nongshong shnong kiba la ktah kti ïa ka kmie jong u hynrei da ka jingïada jong ki dkhot ka Village Defence Party (VDP) ka Kong Meloris ka la shu lait da ka said na ka jingshah bom shnong. Shuh shuh u la ïathuh ruh ba ki nongshong shnong ki la byrngem ruh ban thang wat ïa ka ing ka sem.
