Khliehriat, Naitung 1 : Hadien ba la ioh jingtip kaba tikna ba ka don kawei ka kali Santro kaba wan na Umkiang ban leit sha Khliehriat kaba kit ia ki kynja drugs. Ki pulit ki la pynap shrip ha Umtyra bad ki la ioh bat ia kane ka kali kaba don ia u Registration number TR04-A-0254.
Ki don saw ngut ki briew hapoh kane ka kali kiba la tip kyrteng kum u Amit Mog , u Rajesh Kumar, u Babu Mog bad u Sanjit Debarma, kine baroh saw ngut ki dei kiba na Tripura. Na kine la ioh kurup 51.03 kilo u Ganja, 5 tylli ki mobile phone bad ka pisa 13,540 tyngka. Ki pulit ki la kurup ruh ia kane ka kali.
