Shillong, Naitung, 07: Ka Hand of Hope Society (HoHS) Mooshrot, West Jaiñtia Hills ka la thung ïa ki tynrai dieng kumba 50 tynrai ha ka Lah Sngi u Blei ha ka shnong Mooshrot kum ka jingburom ïa ka mei mariang.
Ïa ka jingthung ïa ki tynrai dieng la lamkhmat da u Supervisor Bah Sunil Lamare ryngkat ka jingsynran lang jong ki dkhot ka society.
Ka Society ka buh kyrpad ruh ïa ki paidbah ba ki dei ban sumar ïa ka mei mariang bad ym pynjot ne leh dusmon ïa ka.
“Kum ka Society ngi buh ka jingkyrpad ïa ki nongshong shnong bad kum ki briew kiba don ïa ka jingïatip lem ngi dei ban hikai ïa ki khun ki kti ki jong ngi naduh na rympei iing kumno ngi dei ban sngewthuh ba ngin ym bret jakhlia ha ki lynti ki syngkien bad ba ngin ïaleh kat kaba lah ban sumar khuid ïa ki sawdong sawkun khnang ba ngin ïoh ïa ka jingkoit jingkhiah bad ba ngin wanrah biang ïa ka shnong ka thaw bad ïa ka jylla hi baroh kawei kum ka jaka bakhuid tam ha ka ri,” la ong ka Society.
Ka Hand of Hope Society (HoHS) ka la ai khublei Beh Deiñkhlam kaba suk bakmen ïa baroh ki khun ka Niam Tre ba u Blei un kyrkhu kyrdoh bad un ïada na ka khlam ka ngoh.
