Shillong, Lber, 01: Ki khynnah skul kiba la pynkhreh bha ia lade kin sa leit ban thoh ia ka eksamin Secondary School Leaving Certificate (SSLC) ba la pynlong da ka Meghalaya Board of School Education (MBoSE) ka ban sdang naduh ka 4 tarik mynta u bnai, katba ka eksamin Higher Secondary School Leaving Certificate (HSSLC) ka la sdang naduh ka 1 tarik mynta u bnai.
Katkum ka jingai jingkhein jong u Joint Director ka Meghalaya Board of School Education (MBoSE) u Bah M. Marbaniang, ki khynnah skul ki ban iakhun ia ka eksamin Secondary School Leaving Certificate (SSLC) mynta ka kynti ki don 55,189 ngut, ha kaba 23249 ngut ki dei ki shynrang bad 31940 ngut ki dei ki kynthei, ba kynthup lang ia ki Regular-1 bad Regular-2, ki Private, ki Non-Regular, Improvement bad Compartmental.
Katba ha ka eksamin Higher Secondary School Leaving Certificate (HSSLC) ki don 28072 ngut kiba dei na ka Arts Stream, 3812 ngut na ka Science Stream, 2440 ngut na ka Commerce Stream bad 11 ngut ha ka Vocational Stream. Haba khein lang ia baroh ki khynnah kiba pule ia ka Class-XII kiba iakhun ia ka eksamin Higher Secondary School Leaving Certificate (HSSLC) ki don baroh 34,335 ngut ba kynthup lang ia ki Regular, ki Private-1 bad Private-2, ki Non-Regular, Improvement bad Compartmental.
Ki Centre thoh eksamin ha Shillong Region ki don 91 tylli bad 68 tylli ha Tura Region na ka bynta ka Secondary School Leaving Certificate (SSLC) katba na ka bynta ka Higher Secondary School Leaving Certificate (HSSLC) ki jaka thoh eksamin ki don 67 tylli ha Shillong Region bad 41 tylli ha Tura region.
Katkum kane ka jingai jingkheiñ jong ka MBoSE, la shem ba mynta u snem 2024 ba ka jingkiew ka nombor jong ki khynnah skul kiba iakhun ia ka eksamin Secondary School Leaving Certificate (SSLC) ka long 2,489 ngut, katba ha ka eksamin Higher Secondary School Leaving Certificate (HSSLC) ka la kiew da 2,329 ngut.
