Shillong, Lber 01: Ha kawei ka jingjia aksiden uwei u nongñiah jong kawei ka trok u la khlad noh hashen hadien ba u la leit tynrah nadien ka trok ha surokbah National Highway ha Mawdiangum.
Kane ka la jia ha ka sngi Thohdieng ha ka por 4:15 baje eiei mynstep ha kaba kawei ka trok kaba la ñiah sted bha kaba don ïa u number AS 01 RC 1762 ka la leit ban tynrah beit nadien jong kawei ka trok kaba don ïa u number ML 11 A 1440 haduh ba u nongñiah jong ka trok kaba don ïa u Number AS 01 RC 1762 ba la tip kyrteng kum u Joynal Abdin Laskar na Assam u la sahkut shipor hapoh ka trok.
Ki bor Pulit jong ka Nongpoh Traffic, mar mar ki la leit sha kane ka jaka ban pynlong ïa ka jingtohkit bad ban sei ïa u nongñiah napoh ka trok bad pynkit mar mar sha Civil Hospital Nongpoh hynrei namar ka jingshitom kaba jur u la khlad noh na kane ka sla pyrthei.
