Tura, K’lyngkot 14 : Ka kynhun ki thei ialehkai phutbol ka East Khasi Hills District ka la jam sha ka semi final ha ka 5th Meghalaya Games 2024 hadien ba ki la sei madan ia ka buit ka bor ialehkai kaba khlain tam na ka bynta ban pynliem haduh 18-0 pyrshah ia ka South West Garo Hills District ha ka jingialehkai kaba la long ha madan Chandmari, ha Tura, mynta ka sngi.
Ka nam tam napdeng ki thei ialehkai jong ka East Khasi Hills District dei ka Inrilaidor Khongtham kaba marwei ka la ioh ba kan thep haduh 8 tylli ki kol, bud pat sa ka Ibashembha Khongsit, Makrisha Songthiang, Ideibanrishisha Kharpan bad ka Daiaijingsuk Basaiawmoit, kiba la ioh ban thep mar ar kol, katba ka Philakyntiewshisha Nengnong lem bad ka Cynthia Mylliemumlong, ki la ioh ban thep mar shi kol.
Ka Inrilaidor ka la pynpaw ia ka jingkmen halor ka jinglah ban ioh ban thep haduh 8 kol ia kaba ka la kam ruh ba ka la thep haduh 9 tylli ki kol hadien ba ka thei apkol jong ka liang pyrshah kam shym la lah ban kyrda (save) ia kawei pat ka kol kaba la iaid lyngba ki ksangkti jong ka.
Kum ban shu pynkynmaw ba ka Inrilaidor ka dei ka thei ialehkai kaba la mihkhmat iaka Jylla ha ka lympung ialehkai Subroto Cup ha u snem 2022 bad 2023, nangta ha ka Natioal School Games 2023 kaab la long ha Bhopal.
Kane ka khynnah kaba dei na ka shnong Lapalang kaba na Pynurla, East Khasi Hills District bad kaba pule ha ka klass-X ha ka skul Iewrynghep SS kaba ha Mawnianglah, Upper Shillong.
Kham hashwa ka East Khasi Hills ka la lah ban pynliem ruh ia ka South West Garo Hills haduh 13-0 kol.
Ha kawei pat ka jingiakhun ki thei ialehkai jong ka Ri-Nhoi District ki la lah ban pynliem da 8 ia ka West Jaintia, ia kine ki kol la thep ia ki da Imaia Shylla ka la ioh ban thep saw kol bud pat sa ka Daiamon Makhroh kaba la ioh ban the par kol, katba Susiemery Lyngdoh Peinlang bad Rimika Khongkai ki la ioh ban thep mar shi kol.
Katba ki thei ialehkai jong ka Easten West Khasi Hills ki la lah ban pynliem noh ia ka East Garo Hills District da 3-0, bad ia kine ki lai tylli ki kol la thep ia ki da Isha Warjri kaba la ioh ban thep haduh artylli ki kol bud pat sa ka Rympeibasuk Syiemlieh kaba la ioh ban thep shi kol.
Ha kawei pat ka jingialehkai, ki thei ka West Khasi Hills District ki la lah ban iakhiad da mar shi kol pyrshah iaka South West Khasi Hills, ia ka shi kol ika West Khasi ills la the pia ka da ka Philaniewkorshishs Lyngkhoi katba ka shi kol ka South West la thep ia ka da ka Joviality Lyngdoh.
