Shillong, K’lyngkot, 14: Ka President jong ka ri India, ka Droupadi Murmu kan wan jngoh ia ka jylla Meghalaya bad Assam naduh ka 15 haduh 17 tarik u Kyllalyngkot, 2024.
Ha ka 15 tarik u Kyllalyngkot, ka President kan plié paidbah ia ka lympung ialehkai 5th Meghalaya Games ha PA Sangma Stadium, Tura.
Ha ka 16 tarik, ka President kan ai jingkren ia ki dkhot jong ki Self Help Group ha ka kad liengsuin Baljek, Tura bad kan buh maw nongrim ia ka Integrated Administration Complex, Tura ba thymmai lyngba ki lad digital.
Ha kajuh ka sngi, kan ai jingkren ha ka jingialang ha Mawphlang bad kan plié paidbah ia ka jingkyntiew ia ka surok Rongjeng-Mangsang Adokgre Road bad ka surok Mairang-Ranigodown-Azra Road da ki lad digital bad kan buh maw nongrim ruh ia ka Shillong Peak Ropeway bad ki jaka sah ki nongjngoh kai pyrthei ha ki shnong Kongthong, Mawlyngot bad Kudengrim. Ha ka janmiet, ka President kan iashim bynta ha ka prokram ba pynlong da ka Sorkar Meghalaya ha Raj Bhavan, Shillong.
Ha ka 17 tarik u Kyllalyngkot, ka President kan iashim bynta ha ka jingrakhe golden jubilee jong ka Karbi Youth Festival ha Taralangso, Diphu, Assam.
