Shillong, Rymphang 09: Haduh 64369 hajar ngut ki khynnah skul kin sa ïaleh ïa ka eksamin Secondary School Leaving Certificate (SSLC) 2025 ba la pynlong da ka Meghalaya Board of School Education (MBoSE), ka ban sdang naduh ka Lah Sngi U Blei.
Ka eksamin Higher Secondary School Leaving Certificate (HSSLC) kan sdang naduh ka 18 tarik, Rymphang, 2025.
U Director ka MBoSE Bah M. Marbaniang ha ka sngi u Blei u la pyntip ba ki jaka thoh eksamin ha baroh kawei ka jylla Meghalaya ki don 164 tylli, kata, 93 tylli ki dei ha Shillong Region, kaba kynthup ha rilum Khasi bad rilum Jaiñtia bad 71 tylli ki dei ha Tura Region kiba dei sha ka thaiñ rilum Garo.
U la pyntip ruh ba ki don haduh 26517 ki khynnah shynrang bad 37852 ngut ki khynnah kynthei ki ban ïakhun ïa kane ka eksamin. Na kine, ki khynnah skul ki ban ïakhun ïa ka Regular– I ki long 29972 ngut, Regular – II ki don 16013 ngut, ha ka Private ki don 1455 ngut, ki Non Regular ki don 1884 ngut, kiba ïakhun ïa ka Improvement ki don 21 ngut bad ha ka Compartmental ki don 15024 ngut.
Ki khynnah ban ïakhun ïa kane ka eksam kin dei na ki 1,896 tylli ki skul. Haduh 698 tylli ki dei ki skul kiba la pynïasoh bad ka MBoSE na Shillong bad Tura Region katba 1,198 ki dei ki skul ki bym pat pynïasoh bad ka MBoSE na Shillong bad na Tura Region.
Ha u snem 2024, ki don haduh 55189 ngut ki khynnah skul kiba ïakhun ïa ka eksamin SSL bad kiba pas ki long 55.80 percent.
U Bah Marbaniang u la pyntip ruh namar ka jingdon jong ka elekshon sha ki ar tylli ki Autonomous District Council (ADC) ha rilum Khasi bad Jaiñtia, ïa ki sobjek kiba ïadei bad ka eksamin SSLC ba la buh sngi ban pynlong ha ka 21 tarik, Rymphang kaba dei ka sngi thep vote la pynkynriah noh sha ka 25 tarik, Rymphang. Na ka bynta ka eksamin HSSLC, ka sobjek Physics kaba hap ha ka 24 tarik, Rymphang kaba ka dei ka sngi ñiew vote la pynkynriah noh sha ka 6 tarik, Lber, 2025 ryngkat bad ka sobjek History, ïa ka sobjek Sociology la pynkynriah sha ka 18 tarik, Lber, 2025 bad ïa ki sobjek Vocational/Poultry Farming-IV/Computer Technique-IV kiba hap ha ka 21 tarik, Rymphang, 2025 la pynkynriah noh sha ka 19 tarik, Lber, 2025.
Ha ka eksamin Higher Secondary School Leaving Certificate (HSSLC) 2025, ki khynah skul ki ban ïakhun ki don 29, 770 hajar ngut, kata, 23,266 hajar ngut ha ka Arts Stream ba kynthup ïa ki khynnah shynrang bad kynthei, 3959 ngut ha ka Science Stream ba kynthup ïa ki khynnah shynrang bad kynthei, 2524 ngurt ha ka Commerce Stream ba kynthup ïa ki khynnah shynrang bad kynthei bad 21 ngut ha ka Vocational Stream ba kynthup ïa ki khynnah shynrang bad kynthei.
Ki jaka thoh eksamin ki don baroh 108 tylli, kata, 67 tylli ha Shillong Region bad 41 tylli ha Tura Region.
Ki skul kiba la pynïasoh bad ka MBoSe ha Shillong Region ki don 191 tylli bad 82 tylli ha Tura Region. Ki skul ki bym pat pynïasoh bad ka MBoSE ha Shillong Region ki don 113 tylli bad 63 tylli ha Tura Region. Baroh ki long 449 tylli.
