Shillong, Ïaïong, 25: Ka Sports Cell jong ka Khasi Students Union (KSU) ka la pynpaw ia ka jingkyndit hadien ba ka la ioh jingtip ba ka Directorate of Sports & Youth Affairs jong ka Sorkar Jylla ka la jied haduh 7 ngut ki khyllah jait napdeng ki 12 ngut ki nongialehkai Basketball ki ban mihkhmat ia ka jylla Meghalaya ha ka Basketball National School Games ka ban long ha Haryana.
Ha u kyrwoh ba la phah da u Chairman ka Sports Cell, Khasi Students’ Union, samla Eric A. Nongkynrih, ka seng ka la ong, ha ka thup ki nongialehkai la jied tang 5 ngut ki trai jylla katba ki 7 ngut ki dei kiba nabar, kata ki bym dei ki Khasi ne Garo.
“Kane ka jingleh shiliang khmat jong ka Sorkar Jylla ia ki khynnah lehkai Khasi ka wanrah ia ka jingkylli hato ka Sorkar Meghalaya ka dei ban kyntiew ia ki Khasi (Khynriam, Pnar, Bhoi, War, Maram & Lyngngam) bad Garo ne ban ai rynsan ban kyntiew ia kiwei pat ki jaidbynriew bym dei trai shnong,” la buh jingkylli ka KSU.
Ka Sports Cell jong ka KSU ka pynrem jur ia kane ka jingleh beiñ bad jingbym kheiñ snep ka sorkar Meghalaya ia ki khynnah Khasi kiba don sap ban thrang ban ia lehkai basketball. Ka KSU ka buh jingkylli hato ka Meghalaya ka rhah tang ban ioh ka nam jop da kaba wanrah da ki nongialehkai ba nabar ne ka thrang ban kyntiew ia ki khynnah ka jylla khnang ba kin kiew shuh shuh ha ki jingialehkai bapher bapher, ong u kyrwoh na ka KSU.
“Kane ka jingleh thurmur ka sorkar kan pynduh mynsiem bad pynduh lad ia bun ngut ki samla kiba angnud bad don sap ban ialehkai ia ka Basketball. Ka Sports Cell ka kyntu ia ki khynnah Khasi ban ym duh jingkyrmen wat haba la shah leh meinah ha ka Sorkar Jylla namar ka seng kan iai wad ki lad ki lynti ban ai rynsan ia ki bad kumjuh ruh ban peit pyrman ba kin ym duh ia ka hok ka jong ki na ka Sorkar,” pynkut u kyrwoh.
