Ba matlah ka Shillong Cantonment Board bad ka Sorkar
Shillong, Ïaïong, 25: Ki nongialam jong ka Hynñiewtrep Youths Council, Seng Kmie ha ka sngi Palei kiba la ioh ujor, ki la leit jurip ia kawei ka jaka kaba la kylla Slum ha lyndet jong ka Them Iewmawlong kaba don ha khappud jong u pud u sam jong ka Shillong Cantonment Board (SCB) bad ka Shillong Municipal Board (SMB).
Ha kane ka jingjurip, ka seng ka la sakhi da la ki jong ki khmat ba ki briew ki shong ki sah ha kane ka Slum da kaba shu shna da ki iing tap shiliang bad ha kawei ka ïing kaba la shna ha ka jingheh ba tang 10 phut la shna ing ar lai kyrdan bad sah palat 20-30 ngut.
“Hadien ba ngi la ioh ia ka jingujor na ki paidbah ba tang shu la kem dum bun ki briew (kiba sah ha kane ka slum) ki mih ban tyrwa drok ha surok. Ngi la ioh ujor ba ki bun kiba sah be-ain kiba ngim tip bad don kiba ong ba ki dei ki Ronghiya Muslim. Kane ka jaka ka dei kaba hap hapoh u pud u sam jong ka Shillong Cantonment Board, ong u President ka HYC Bah Roy Kupar Synrem ha ka jingiakren bad ki lad pathai khubor.
“Tang ha ine i jaka barit, ym lah satia ban mutdur hapdeng ka sorkar ba kin don ki longing 90 haduh 100 ing. Kine ki briew, haba ngi tohkit, kim dei ki nongshong shnong jong kane ka jylla. Kim don wat ia ka EPIC, ki wan na kiwei ki jylla jong ka ri India,” u la ong.
Ha ka jingtohkit jong ka seng ia ki briew kiba sah ha kane ka jaka, ki la kam ba ki wan na ka Jylla Assam bad na Uttar Pradesh.
“Ki la pynlong kum ka Slum. Ka long long kum kawei ka Colony bad ka shnong ka barit jong kine ki phetwir, ki poiei kiba la pynlong kum ka jaka shongshngaiñ ha kane ka ri jong ngi,” u la ong.
U la ong ruh ba ka seng kam kwah ba na kane ka jaka kin mih shibun ki jingma bad ki jingjia kiba lah ban lam sha ki jingjia ba sngewsih. “Kine ki briew kim don ia ki kot ki sla bad lada ki leh ia ki kam runar ngi thikna ba ki Pulit kin ym lah ban wad ia ki,” la ong shuh shuh u President ka HYC.
Kaba kham phylla shuh shuh ka long haba ki dkhot ka HYC ki la tohkit ia kine ki briew, ki la phla ba kim shym la iohbor nangno nangno hynrei la ai wai da ki katto katne ki Harijan kiba sah ha Them Iewmawlong bad hadien ka jingjia ha Them Iewmawlong ha u snem 2018 ym shym la shim shuh ia ka bai wai.
Haba kynthoh ia ka jingbym iohi khmat jong ka Shillong Cantonment Board, u Bah Synrem u la ong, “kane ka jaka ka hap hapoh ka Shillong Cantonment Board hynrei kumno ka Cantonment kam tip ba ki don 90 haduh 100 tylli ki longing bad jingdon jong ki briew da ki spah ngut kim shym la leh eiei ia kiba sah ha kane ka jaka. Ngin sa leit ban iakynduh ia ki bor pyniaid jong ka Shillong Cantonment Board ban pynthikna ba dei ban weng ia kine ki briew na kane ka jaka.”
“Ngi iohi ba ka Shillong Cantonment Board tang shu tampud sha ka jaka jong ka, ka la kloi ban pynpra bad ban shim ia kino kino ki sienjam ban pynpra ia ki jingtei hynrei kaba lyngngoh ka long ba ia kine ki jingtei hapdeng ka sor kam shym la pynpra bad ban beh ia ki briew kiba shong be-aiñ ha kane ka jaka. Ka jingdon jong kane ka Slum kaba isaitment haduh katta katta hapdeng jong ka sor Shillong kan wanrah ia ka jingbudnam bad ka jingpynthohbria ia ka sor Shillong,” u la bynrap.
U la iathuh haba ka seng ka la tohkit ia kiba sah ha kane ka Slum naei ki ioh ban ring ia ka bording, ki la phla ba ki ring ia ka bording na kawei ka ing kaba la ioh ring ia ka bording ban pyndonkam lang ha ki 90-100 tylli ki ïing.
“Ka jingkylli ka long ba ka MeECL ka leh aiu halor kane. Sha ki nongkyngdong tang shu lap ia ki paradoh parasnam jong ngi kiba slem ban siew ia ka bai thang bording ki kloi ban leit ot ia ka bording hynrei ia kine ki briew kiba shong hangne, ia kiba ma ngi kiba hap ban siew ia ka bai thang bording, ngi hap ban bah lang ia ka jingkit kaba ka MeECL ka iakynduh ba kim lah ban siew ia ka ram ka shah jong ka, hynrei ngi sngewkyndit ha kane ka jaka pat ki (MeECL) ai ei ia ka bording da ki phew phew snem,” la kynthoh u Bah Synrem.
“Kaba lyngngoh ka long ba kine ki briew ki ong ba ki la sah hangne da ki phew snem. Ka jingkylli ka long ba ka Sorkar, ka Shillong Cantonment Board, ka MeECL ki leh aiu halor kine? Balei ka Sorkar ka matlah bad kam iohi ba kum kine ki briew ki don hangne?” la buh jingkylli u President ka HYC.
U la ong ba ka seng kan sa leit ujor sha ka Shillong Cantonment Board bad ban dawa ba ka dei ban buh jingkhein ia baroh ki briew kiba sah be-aiñ ha kane ka Slum bad beh noh shisyndon bad bynrap ba ka seng kan sa leit ujor sha ka MeECL bad ban dawa ba ka dei ban ot noh ia ka bording ba la ai sha kine ki briew.
“Lada ka Shillong Cantonment Board kam leh eiei, ngin sa leit ban iakynduh ia ka Sorkar ba kan leh eiei halor kane namarba kine ki briew kin buh jingma ia ka jylla jong ngi,” ula ong bad iathuh shuh shuh, “ha ka por ba ngi rung ha kane ka jaka, tang shu iohi ia ngi, kiba ju mlien ban die drok ki phet na kane ka jaka. Ngi sngewthuh ba kane ka jaka ka dei ka ktem die drok bad ka ktem jong ki kam sniew kiba jia ha kylleng ne hajan kane ka jaka. Ia ka kyrteng jong ki (suba nongdie drok), ngi la ioh bad ngin sa buddien lyngba ka tnat kaba peit ia ka jingkhaii drok be-aiñ khnang ba ki nongkhaïi drok kim dei ban iohlad ban sah ha kane ka jaka.
Haba kylli, u la iathuh ba ki briew kiba sah beain ha kane ka slum, ki dei kiba shu im da kaba tam bilor, tam tin jot katba ki don pat ki shynrang kiba trei bylla, trei misteri bad don ruh kiba kam ba ki dei kiba trei ha Municipal bad ha ki dukan.
