Shillong, ïaïong, 02: Ki Pulit ka nongbah Shillong ha ka janmiet jong ka sngi Baar ki la rah ban tian bishar ha Kashari jong u District and Session Judge, East Khasi Hills District ia ki arngut ki dkhot jong ka Khasi Students Union (KSU) South Khasi Hills District Unit hadien ba la kem ia ki na ka shnong Wah-U-Tim bad na ka shnong Saitsohpen, Sohra ha ka miet shiteng synnia jong ka sngi nyngkong.
Kine ki arngut ki dkhot ka KSU kiba la tip kyrteng kum u Shanborlang Shati, 26 snem ka rta bad u Mesadapbor Skhembil, 26 snem ka rta ki la shah kem halor ka jingshah pyniap jong ki arngut ki bar jylla ha ka shnong Ichamati kaba la jia ha ka 27 tarik u bnai baladep kiba la tip kyrteng kum u Ishan Singh bad u Sudip Dutta.
Na ka liang jong ka Kashari ka la aibor ia ki Pulit ban set along 7 sngi ia kine ki arngut ki dkhot ka KSU khnang ba ki Pulit kin dup lah ban pynlong ia ka jingtohkit kaba bniah.
Katba ki Pulit ki dang rah ban tian bishar ia kine ki arngut ha Kashari, ki bahaing hasem ki la bud ban synran lang ia ki tad haduh ka khyllipmat ba la mih na Kashari.
