Shillong, ïaïong 02: Arngut ki dkhot jong ka Khasi Students Union (KSU) South Khasi Hills Unit ki la shah kem ha ki Pulit ka por shiteng synnia halor ka jingsuba ba ki dei kiba donkti ha ka jingshah pyniap jong ki arngut ki bar jylla ha ka shnong Ichamati ha ka 27 tarik u bnai baladep.
Kine ki arngut ki dkhot ka KSU kiba la shah kem ha ki Pulit ki dei kiba la tip kyrteng kum u Shanborlang Shati 26 snem ka rta na ka shnong Wah-Utim bad u Mesadapbor Skhembil 26 snem na ka shnong Saitsohpen, Sohra.
Hadien ba la kem ia kine ki arngut ha ka miet Lah Sngi u Blei, la set ha along jong ka Sohra Police Station bad ha ka step sngi Baar la wanrah noh sha Shillong bad la set ha Sadar Police Station na ka bynta ban pynlong ia ka jingtohkit.
Ki bahaing hasem ha ka jingiakren bad ki lad pathai khubor habar ka Sadar Police Station ki la iathuh ba ki Pulit ki la wan kem ia kine ki arngut ki dkhot ka KSU ha ka por shiteng synnia kumba ha ka por 1:15 baje mynstep sngi Baar.
Ki bahaing hasem ki la iathuh ba ki Pulit ki la rah ia kine ki arngut ki dkhot ka KSU na ka bynta ban pynlong ia ka jingtohkit.
Kum ban shu pyntip, ki arngut ki bar jylla kiba la shah pyniap ki dei kiba la tip kyrteng kum u Ishan Singh bad u Sujit Dutta. Ia ki metiap jong kine ki bar jylla la lap ha ka por janmiet ha ka shnong Ichamati bad ha Dalda kaba hap hapoh ka Shella Police Station, East Khasi Hills District.
Kane ka la jia ryngkat, ha kane ka sngi ba ka Khasi Students Union (KSU) ka la pynlong ia ka jingialang ha ka por mynsngi ban pyrshah ia ka Citizenship (Amendment) Rule, 2024.
Ka Coordination and Welfare Committee (CWC) Shella Bholaganj Block dang shen ka la la ujor sha u Myntri Rangbah ka Jylla u Conrad Kongkal Sangma halor ka jingshah pyniap jong ki arngut ki bar jylla ha ka shnong Ichamati.
Ha ka ujor ba la soi da u President ka CWC, Shella Block, Gopal Dey ka la dawa ia ka Sorkar Jylla ban kem mardor ia ki briew kiba donkti ban pyniap ia u Ishan Singh bad ia u Sujit Dutta ha Ichamati ha ka 27 tarik bad dawa ruh ban aiti ia ka jingtohkit sha ka CBI/NIA lada ki Pulit ka Jylla kim lah ban kem ia ki nongleh kam bymman hapoh shitaiew, ban siew bailutksasn sha ki bahaing hasem jong ki arngut kiba la shah pyniap bad ban pynthikna ia ka jingshngaiñ jong ki bar jylla Hindu kiba buhai shnong ha Ichamati bad ha ki shnong bamarjan.
Ka CWC ka la phah ruh ia kane kajuh ka jingujor sha u Myntri Rangbahduh ka ri Narendra Modi bad sha u Myntri ka tnat Kam Pohing Amit Shah bad sha u Lat ka Meghalaya u Phagu Chauhan.
Lyngba kane ka ujor, ka CWC, Shella Block ka la teipop ba dei ki dkhot runar jong ka Khasi Students Union (KSU) kiba la pyniap ia u Ishan Singh bad ia u Sujit Dutta.
