Shillong, Risaw, 27: Ka Hynñiewtrep Youths Council (HYC), Ribhoi Sepngi Circle ha ka sngi Thohdieng ka la pynsngew ha u Myntri ka tnat Pule Puthi ka Sorkar Jylla u Rakkam A. Sangma halor ka jingduhnong jong ki khynnah skul jong ka thaiñ Ribhoi Sepngi na ka daw ka jingbym pat lah ban shna pyndep ia ka Residential School kaba don ha ka shnong Jirang, Ribhoi District.
Ia kane ka skul, la shna naduh ka 8 tarik, Nohprah, 2014 bad la buh thong ban pyndep hapoh 24 bnai hynrei mynta la khyndai snem kynthih ym pat lah satia ban shna pyndep ia kane ka Residential School.
“Lada lah ban shna pyndep noh ia kane ka skul, kan long ka jingmyntoi ia ki khynnah skul jong ka thaiñ bad ka jingpynslem ban plie paidbah ia kane ka skul ka la long pynban ka jingduhnong kaba khraw ia ki khynnah kiba sah ha ki shnong kiba hap hapoh ka Ri Bhoi sepngi,” ong u President ka HYC Ribhoi Sepngi u Bah RC Thangkhiew ha ka jingiakren bad ki lad pathai khubor.
Ka seng lyngba ka dorkhas, ka la ong, lada ladep shna pyndep hynrei lada shu ieh lyngkrang kumtu khlem da pyndonkam, kane ka iing skul kan long kylla long pynban ka ktem jong ki riewsniew.
“Ngi kyntu ia ka Sorkar ba kan shimkhia mardor ban pyntreikam noh ia kane ing skul khnang ba kan long ka jingmyntoi ia ki khynnah jong ka Ribhoi Sepngi,” u la ong.
Ha kajuh ka por, ka seng ka la pynsngew ha u Myntri ka tnat Pule Puthi ban bthah ia ki bor badei peit ban buh noh ia kawei ka MTET Centre na ka bynta ki samla pule kiba shong basah ha Ri Bhoi sepngi, kata, ha Patharkhmah lane Jirang khnang ba kan pynsuk ia ki samla kiba thoh ia ka eksamin namarba ia mynta, kiba iakhun ia ka eksamin MTET ki hap ban leit thoh eksamin sha Nongpoh nalor ba ka long ka lynti kaba jngai.
