Shillong, Jylliew, 12: Ka long kaei kaei kaba pynsyier mynsiem ia ki paidbah nongleit nongwan bad khamtam eh ha kum kane ka por ba ki jingsniew ki la nang kynrei bha namar ka jingjyllei jong u drok.
Ha ka janmiet sngi Baar mynta ka taiew, ki dkhot jong ka Hynniewtrep Youths Council (HYC) ryngkat bad ki bor synshar jong ka Dorbar Shnong Lawmali, Shillong ki la ioh bat ia ki nongkhaïi drok kiba thep ruh ia ki tiar pynmynsaw.
Ha ka jingkhynra ha ka Lawmali, ha ka ka por 9:30 baje mynmiet, ki dkkhot ka HYC ki la ioh bat haduh 15 ngut ki nongdie bad ki nongdih drok.
Na ka met jong ki katto katne ki nongdie bad nongdih drok, ki dkhot ka HYC ki la ioh kurup na ki pla jong ki ia ki tiar pynmynsaw kum ki tari, ki khurat nar bad u nar rot.
Nalor kine ki tiar pynmynsaw, la ioh kurup ruh ia u drok, ia ki tyndong ba thylli ba ju pyndonkam ban pyndep ia u drok, ia u Ganja, bad ia ki thyrnia injekshon.
Ha ka jingtohkit da ki dkhot ka HYC, kine ki ki nongdih drok ki phla ba ki ju leit tuh ia ki nar jot na kylleng ki bynta ka sor Shillong ha ka por 3:00-3:30 baje dang step phyrngab.
Ynda ladep lum shi jaka ia kine ki jingdih pynbuaid ka HYC ka la thang noh da ka ding bad bthah ia kine ki nongdih drok ban wan mih sha ka ophis treikam jong ka seng ryngkat bad ki bahaing hasem khnang ba ka seng kan ai ia ka sneng ka kraw ba kin lait noh na ka jingim kyrni ha u drok.
