Shillong, Jylliew 12 : Dang hapoh khyndiat sngi ba kawei ka nongpang ka la ujor halor ka jingbym shimkhia jong ki Nurse kiba shakri hapoh ka Nongpoh Civil Hospital, mynta ka kynti sa ka Kong Bindas Syiem ka la pynpaw ia kane kajuh ka jingleh bym suidniew jong ki Nurse hapoh kane ka hospital.
Ka Kong Bindas Syiem hadien ba ka la weng noh ia ka jingiakhih da kaba shong shah thngan khlem pud ha Shillong mynta la san sngi eiei hadien ba ka la leit phai sha la iing ka la kem pang ha shiteng lynti tang shu poi ha Umsning bad mar mar la pynkit noh ia ka sha Nongpoh Civil Hospital ban ioh jingsumar namar ka jingtlot ha ka bor met.
Hynrei kum ka nongpang ka la mad pynban ia ka jingbym kitkhia jong ki bor ai jingsumar jong ka Nongpoh Civil Hospital Nongpoh ia ki nongpang.
Ha ka jingiakren bad ki lad pathai khubor, ka Kong Bindas Syiem ka la iathuh, mar ia poi ha Nongpoh Civil Hospital, ka la khie tlot bha ha ka bor met bad shiteng miet ka la donkam kyrkieh ia ki Nurse ne Doctor namar ka jingbym iaid bha jong ka dawai Drip. Katba ka nongap ka la leit khot ia ki Nurse kiba don ha kamram hynrei kim shem la plie satia ia ka jingkhang bad kim shym la wan peit satia ia ka Kong Bindas watla ka la khie tlot. La iathuh ba ki Nurse ki la wan peit ia ka jinglong jingman jong ka Kong Bindas haduh ka por 6:30 baje mynstep.
Ka Kong Bindas ka la iathuh ruh ba ym tang ma ka, kaba la mad ia kane ka jingbym shimkhia jong ki nongsumar ha Nongpoh Civil Hospital hynrei ka don ruh sa kawei ka longkmie ka Kong Ibanjalin Marbaniang na Kyrdem Kulai kaba la kham shitom jur bha kaba la donkam bha ia ki Doctor bad ki Nurse ha ka por shiteng miet bad watla ki la phah khot ia ki Nurse hynrei ym don satia ba wan khmih ne wan ai dawai ia i tad haduh ka por mynstep.
Shuh shuh ka Kong Bindas ka la pynpaw ia ka jingsngewdiaw halor ka jingbym kitkhia jong ki nongtrei ka Hospital ia ki nongpang katba ka tulop ki ioh beit thik thik manla u bnai.
Namar kane ka jingbym kitkhia jong ki nongai jingsumar ka Kong Bindas ka la iathuh ba kan sa leit wad jingsumar noh sha kiwei pat ki Hospital namar ka jingbym sngewhun ia ka rukom sumar ha Nongpoh Civil Hospital.
