Shillong, Jylliew, 14: Ka heprit Nafisabeth D. Syiemlieh, kaba dang pule ia ka Class-IX ha Byrwa RMSA Secondary School, kaba dei ka khun jong u Bah Werson Diengdoh bad ka Kong Pranty Mary Syiemlieh na ka shnong Byrwa, Ribhoi District ka la shah jied ban mihkhmat kum ka Youngest Scientist na Ribhoi District ha ka Yuvika Programme.
Ka heprit Nafisabeth ka la shah jied ban iohrung sha ka Yuvika Programme ka long lyngba ka jingiashim bynta ka jong ka ha ka Online Quiz Game jong ka Yuvika Programme kaba la long ha u bnai Lber, 2024.
Lyngba ka jingshah jied ban mihkhmat ia ka Ribhoi District, ka heprit Nafisabeth ka la iohlad ban leit iashim bynta ha ka Yuvika Programme kaba ar taiew kynthih kaba la long ha North East Space Application Centre, (NESAC) Umiam, Ribhoi District, naduh ka 12 tarik haduh ka 24 tarik u Jymmang, 2024.
Ki dkhot jong ka Khasi Students Union, North Khasi Hills District Unit tang shu ioh jingtip halor kane, ha ka janmiet sngi Palei mynta ka taiew ki la leit sha ingsah jong ka heprit Nafisabeth ban pynkup burom ia ka hapoh ka jingialam jong u General Secretary u samla James Mawphniang ryngkat ka jingsynran lang jong ki dkhot ka KSU Umiam Circle bad ki dkhot jong ka KSU Byrwa Unit.
