Shillong, Jylliew 14 : Ka Phudmuri Presbyterian Higher Secondary School, Mawlai Phudmuri ka la jam sha u mawmer ka jingdap 125 snem ha ka jingïaid lynti ban bsa ïa ki umpohliew jingstad bad ha ka sngi Thohdieng ka la rakhe ïa ka Quasquicentennial ha ka rukom kaba iphuh iphieng.
Ha kane ka jingrakhe la ïa don lang u Bah Prestone Tynsong, Symbud Myntri Rangbah ka Sorkar Jylla kum u kongsan, u MLA Mawlai Bah Brightstarwell Marbaniang, MDC Mawlai Bah Teiborlang Pathaw, Bah HM Shangpliang u Adviser ka tnat Pule Puthi, u Bah M. F. L Mawlong President ka Managing Committee ka Phudmuri Presbyterian HSS, Bah S. W Nongbri, Secretary ka Managing Committee, ki nonghikai, ki kmie ki kpa bad kiwei kiwei.
Haba ai jingkren u Bah Prestone u la pynpaw ba u ieng na ka bynta ka tnad pule puthi jong ka Sorkar Jylla ban ai khublei ïa ka Phudmuri Presbyterian HSS, kaba la jam shaduh une u mawmer uba la jngai bha.
“Mynta la kumba 5 ne 6 snem, na ka liang ka sorkar ngi la pyrshang ban nangpynkhlain shuh shuh ïa ka pule puthi. Namarba ngi ïohi ba dei kane ka bynta kaba donkam tam, ym tang ha ka jylla Meghalaya, ym tang ha ka ri India, hynrei ha satklak ka pyrthei bad ka pule puthi ka dei u thied snam jong ka ri, ka jylla, ka shnong, ka balang bad ki longiing ki longsem ruh,”
“Dei na kane ba ngi pynheh ïa ka mang tyngka na uwei u snem sha uwei pat u snem, ha ka mang tyngka jong u snem 2023-24, kaba mut mynshem snem ngi buh ïa ka mang tyngka kaba 3166 klur bad nga sngewbha ban pyntip ïa phi ba ha ka mang tyngka ba mynta u snem 2024-25, ngi la kyntiew ïa ka mang tyngka sha ka 3538 klur tyngka,” u la bynrap.
Haba shu kren ïa kitei ki jingkhein, sngewsuk bha ban ong ba ngi ïoh 3500 lane 3100 klur bad mynta la kumba 6 snem tam, ngi kyntiew khnang bangin nanglah ban pynkhlain haba ïa dei bad ka jinghikai, ban ai jinghikai ïa ki nonghikai ba kin lah ban ai ïa ki jinghikai ba janai (quality) ïa ki khynnah skul, kiban ïa ryngkat dor bad kiwei jylla ne ki nongbah kiba paw hapoh ka ri India baroh kawei, ong u bah Tyngsong.
U ong ruh, kawei na kita, ka sienjam kaba ngi la shim ka dei ka Mission Education, ban kyntiew ïa ki skul ha ki jingtei bad kiwei, la ki dei ki skul sorkar ne kiwei ki skul. U ïathuh ruh ba ki la sdang ban ai bun ki jingtei (building) ba thymmai na ka bynta ki skul primary.
Kawei pat ka bynta ka dei ka Meghalaya Teacher’s Information Management System, kaba ki kwah ban kham pynbit pynbiang ïa ki teknologi, ka jingangnud jong ka sorkar ka long ban kyntiew pynbha ïa ki nonghikai, kaba la pynlong ïa ka sorkar ban pynbor ïa ki nonghikai ba ki dei ban leit ïa ka training, namar haba ki pass ïa ka training, ka jinghikai ïa ki khynnah, ym donkam shuh ban batai mano mano lyngba ka training kaba ki ki ïoh kin ai ïa ki khynnah skul ki jong ki ïa ki jinghikai kiba biang pura.
Shwa kane ban pyniphuh iphieng ïa ka jingrakhe la don ka jingshad na ki nonghikai, na ki khynnah pre primary section, kumjuh ka jingrwai na ki kmie ki kpa, na kiba la pass na kane ka skul bad kiwei kiwei.
Ha ka jingpynkut ïa ka jingrakhe u Bah Prestone bad kiwei ki la pyllait ïa ka Souvenir jong ka skul.
