Shillong, Jylliew 14: Ka Seng HNLC ka la ong ba ki lai ngut ki briew kiba la shah kem ha ki Pulit jong ka Ribhoi halor ka jingkynnoh ba ki dawa pisa ha kyrteng ka HNLC, ki dei kiba shong kiba sah ha Block 2, ka jaka kaba don ha ka jingïakajia pud hapdeng ka jylla Meghalaya bad ka jylla Assam.
Ki Pulit ka Ribhoi District ha u kyrwoh ba la phah sha ki lad pathai khubor mynta ka taïew, ki pyntip ba kine ki lai ngut kiba shah kem ki long u Cyfrank Paul Pariat, 25 snem, na Ummat, u Kitbok Mujai, 23 snem na Ummat bad u Barnabas Lyngdoh, 49 snem na Khyndewso. Ki Pulit ki kynnoh ba kine ki donkti ban sam ïa ki shithi dawa pisa jong ka HNLC ryngkat ruh ka jingbyrngem briew.
Katkum ka jingpyllait khubor u Bah Saiñkupar Nongtraw, General Secretary-cum-Publicity Secretary ka HNLC ha ka sngi Thohdieng u la ong ba kine ki lai ngut ki dei kiba la long ka jingshngaiñ bad jingïada na ka bynta ki paidbah kiba shong ba sah ha Block 2 na ka jingwan thombor da ki Pulit Assam, na ka jingshah knieh ki jingthung jingtep ha ki Kaikhlaw Karbi, ka jingshah khrong khajna bad kiwei kiwei de ki kam shah thombor.
Ka Seng ka pynpaw ruh ka jingsngew lyngngoh balei ba katba shah kem ki dkhot ka HNLC la kynnoh beit ba ki dei ki nongdawa pisa jubor, ki riewbymman, katba ka tnad Pulit ka pyllait suk ïa ki briew la jong kiba donkti ha ki kam bamsap, kam dawa pisa ha surok nalor ba kam don ka jingtreikam kaba khuid ha ka rukom pyndonkam ïa ka pisa kumba ka phla da heh Pulit hi, u Bah GK Ïangrai.
Ha kane ka jingpyllait khubor, ka HNLC ka la pynpaw ruh ïa ka jingtreikam ba runar jong ki Pulit kumba la mih khubor ha kine ki sngi ha kaba uwei u rangbah ba la 70 snem ka rta u la shah pyndait da u ksew ha Dawki Police Station.
Shuh shuh ka HNLC ka la ong ruh ba hapdeng ka jingsngew kmen ba la shimti da ka longkmie Khasi ïa ka kam DGP, hynrei ka la ong ba ka seng ka artatien ba kane kan ai ïa ka jingshakri na ka bynta ki trai ri trai muluk, ïoh ka shah pyniaid ban shakri na ka bynta ka bha ka miat jong kiwei pat ki jaidbynriew.
