Shillong, Jylliew 14: Ka seng Hynñiewtrep Youth Council (HYC) ka la phah ka jingai jingmut sha ka Expert Committee kaba khmih ïa ka bhah kam bhah jam jong ka jylla ne ka State Reservation Policy 1972 ha kaba ïa kane ka jingai jingmut la phah sha u Bah L K Diengdoh u ba dei u Secretary jong ka Committee.
Ha ka jingthoh ba ka la phah ka la ong ba na ka liang ka seng ka kwah ban ai jingmut bad ki jingpyni ha kaba ïadei bad ka Expert Committee halor ka Meghalaya State Reservation Policy bad lyngba kane ka jingthoh la kyrmen ba ka kan don ka jingpynkylla bad ka jingpdiang ïa kane ka jingai jingmut jong ka seng kaba dei ruh na ka bynta ka bha ka miat jong ki trai ri trai muluk ha ka jylla.
“Ngi don ka jingai jingmut ba lada ka Hon’ble Supreme Court ka bat ïa ka sub-classification jong ki ST/SC ka dei kaba long aiñ hapoh ka riti synshar ka ri, kumta halor kane ka nongrim jong ka jingbun paid ki Khasi-Jaiñtia, ka bhah kam ka dei ban long 50%, ki Garo ki dei ban ïoh beit 40% bad kiwei ki kynhun ST dei ban ai beit 3% ka bhah kam. Lada ka sub-classification jong ki ST/SC ka long kaba beaiñ katkum ka jingai jingmut jong ka Hon’ble Supreme Court, kumta ngi don ban ai jingmut ba kadei ban long noh 93% ka bhah kam sha ki ST jong ka jylla, 2% sha ki SC bad 5% dei ban ïeh ha ka unreserved category,” ong ka HYC.
Ka la ong ruh ba ha ki kam ha ki District level ka la ai jingmut ba ka combined reservation na ka bynta ki ST dei ban pynneh. Ka bhah kam kadei ban kyntiew sha ka 93% na ka bynta ki ST jong ka jylla ha ki District, 2% sha ki SC bad 5% sha ka unreserved category.
Ka HYC ka la ong ruh ba ka Meghalaya State Reservation Policy ka la kynthup lang ïa ki ST bad SC hapoh kawei ka kyrdan, ha kaba kiwei ki ST bad SC la kynthup lang na ka bynta ka 5% reservation. “Ngi ai jingmut ba kane kadei kaba beaiñ bad ngi dei ban ong ba ïa kane dei ban pynduhnoh bad ba ka reservation na ka bynta kiwei ki ST bad SC jong ka jylla dei ban long 3% sha kiwei ki ST bad 2% sha ki SC ha ka jaka jong ka combined 5% reservation,” bynrap ka seng.
Ka la ai jingmut ruh ba dei ban don ka jingbhah kam na ka bynta ki kam casual, contractual bad non-permanent employee kiba trei hapoh ka jaka pule sorkar bad kiwei lada ka por kadei palat ban ïa ka 30 sngi bad lada ka don ka lad ban pynthymai ïa ka por jong ka kam.
Ka la pynpaw ruh ba kane ka Reservation policy kaba mynta kam bhah kam hapoh ki Scientific services bad post. Kumta ka la dei ban batai ïa ka jingmut jong ka Scientific service bad ki post.
Ki kyndon hapoh ka Policy kaba thoh ‘carry-forward’kum ka nuksa lada ki reserved Category-A ym lah ban thep kam ha ka por ba thungkam ha ka snem ba la buh, kumta kano kano ka percentage kaba sah napoh ka Category-A dei ban pyndap da ki kyrtong napoh ka reserved Category B ne C kaba long katkum ka jingshemphang bad jingnang jingstad.
Ka bhah ha ki post bad ki jingshakri kaba hapoh ka ‘Public Undertakings and Government Aided Institutions’ dei ban pynneh. Ka kyntien “Government Aided Institutions” kaba khlem batai hapoh ka Policy donkam ban batai bha. Lada ki skul kum ka SSA, ADHOC bad Deficit la kynthup hapoh ki jaka pule ba ïoh jingïarap na ka sorkar, kumta la sngewdei ban ai jingmut ba 93% ka combined reservation na ka bynta ki ST, 2% na ka bynta ki SC bad 5% na ka bynta ki unreserved category kidei ban ai katkum ka jingtyrwa hapoh ka recruitment.
Ka seng ka la ai jingmut ruh ba ka sorkar kadei ban thaw da ka aiñ ba kyrpang na ka bynta ka reservation jong ki nonghikai kiba hikai ha ki jaka pule sorkar bad kiba ïoh jingïarap na ka sorkar ha ka jylla. Lada ka sorkar ka thaw la ka jong ka aiñ na ka bynta ka reservation ïa ki nonghikai, la sngew dei ban ai jingmut ba ka dei ban long 93% ka combined reservation na ka bynta ki ST, 2% na ka bynta ki SC bad 5% na ka bynta ki unreserved dei ban bud.
“Ngi don ban ai jingmut ba kane ka Job Reservation Policy kaba mynta ym dei ban pyntreikam ne pynjlan na ka bynta ki reservation haba ïadei bad ki admission ha ki jaka pule bad na ka bynta kito kiba pule kham shajrong shabar jylla ha ka bhah kam jong ka jylla. Shuh shuh ngi don ka jingai jingmut ba ka sorkar jylla kadei ban thaw da ka aiñ la ka jong na ka bynta ki reservation hapoh ki admission ha ki jaka pule. Lada ka sorkar kan thaw la ka jong ka aiñ ngi don ban ai jingmut ba 93% ïa ka combined reservation na ka bynta ka ST, 2% na ka bynta SC 5% na ka bynta ki unreserved kadei ban bud,” ong ka HYC.
