Shillong, Jylliew, 18: Ki Pulit ka East Khasi Hills District ki la syrtap ha phyllaw jong ka Ingbishar Meghalaya High Court hadien ba la ïoh pdiang ïa ka email byrngem ban buh bomb hapoh kane ka Iingbishar kaba don ha dohnud ka sor Shillong.
Kane ka dei ka sien ka baar ba ka Meghalaya High Court ka la ïoh pdiang ïa ka jingbyrngem buh bomb lyngba ka email.
Kum kane kajuh ka jingbyrngem ka la jia teng ha ka 6 tarik, Kyllalyngkot, 2024 ha kaba ki runar bym lah ban tip ki la phah lyngba ka email da kaba byrngem ban pynbthei bom hapoh ka phyllaw jong ka Iingbishar.
Uwei na ki heh Pulit u la ïathuh ba tang shu ïohpdiang ïa kane ka email ba la phah sha ki bor ba dei khmih jong ka Iingbishar, marmar ka tnat Pulit ka la phah ïa ka kynhun Bomb Squad bad ïa ki ksew hynrei ynda la pynlong ïa ka jingkhynra ym shym la lap eiei satia.
Ha kaba ïadei bad kane, ki Pulit ki la pynlong ïa ka jingtohkit kaba bniah ban lap ksai ïa kiba donkti ban phah ïa kane ka email byrngem ban pynbthei bom.
