Shillong, Jylliew, 18: Ki runar na ka Jylla Assam kiba wan kawei ka kali Scorpio ronglieh ka bym don ia u registration number ban rahbor ia uwei u nongniah trok ki la ngat pynban ha ka shrip ba la pynap da ki Pulit jong ka Ribhoi District ha ka sngi Baar.
Ia kine ki saw ngut ki runar la tip kyrteng kum u Pradip Gogoi na Dibrigarh, u Tulian Phukan na Lakhimpur, u Pranjal Gogoi na Tinsukia bad u Deep Das na Bugaghat, Assam katba u nongniah trok uba la shah rahbor u dei uba la tip kyrteng kum u Preenchand Kumar Mali bad ka trok kaba u ñiah ka dei kaba don ia u number JH02-AK-9061.
U Additional Superintendent of Police jong ka Ribhoi District u Bah Banraplang Jyrwa, ha ka jingiakren bad ki lad pathai khubor u la iathuh ba ka la shimpor naduh ka por 4:00 baje janmiet ban kthong ia kine ki runar bad ïohkem haduh ka por 6:00 baje janmiet.
“Na ka jingïoh ujor na ka por sha ka por ba ki don ki jingshah lute jong ki trok ha surokbah National Highway ngi ju pynlong ka jingtalasi ia ki kali. Mynta ka sngi, hadien ba ki Pulit ki la ïoh jingtip ba ki don saw ngut ki runar kiba la pyndonkam da ka Kali Scorpio ronglieh ban rahbor ia uwei u nongniah trok ngi la pyntip sha ki Pulit ka Umsning bad ka Umiam Police Station. Ha ka jingshah kthong ha ki Pulit ki runar ki la khynñiat noh ia u nongñiah shabar ka kali bad phet krad ialade tang ban lait na ka kti jong ki Pulit,” la iathuh u Addl. SP.
Ki Pulit ki la pynap shrip ha Umsning ban ïoh bat ia kine ki runar hynrei ki runar ki la lait phet na kane ka jaka ba la pynap da ki Pulit bad kumjuh ruh ha Saiden ka jaka ki Pulit ki la pynap shrip bad tad ynda la poi ha Nongpoh ba ki Pulit ki la hap ban siat kuli pyntieng sha suin ha kaba la ïohkem ia ki runar ynda ki la kynthih na ka kali ban rung sha khlaw ynda poi ha Nongpoh Dowgate.
Ia u nongniah jong ka trok ba la pyllait im da ki Pulit la pynkit noh sha Hospital bad ki Pulit ki la pynlong mynta ia ka jingtohkit kaba bniah halor kane ka jingshah rahbor jong une u nongniah trok.
Ki saw ngut ki runar ki dang don haduh mynta ha ka kti jong ki Pulit ka Ri Bhoi kiba dang pynlong ia ka jingtohkit kaba bniah halor ki kam dawai pisa bad kumjuh ruh ban lap ksai la ki dang don neem sa kiwei kiba iadonkti lang ha kane ka kam dawa pisa ha surokbah National Highway ha Ri Bhoi.
