Shillong, Jylliew, 21: Ka Dorbar Shnong Mawryngkneng ha ka sngi Thohdieng ka la ïeng pyrshah ïa ka jingai jingkyrshan jong u MLA ka Mawryngkneng Constituency u Bah HS Kharpran ban buh ïa ka Police Checkpost ha surokbah National Highway ba dang hap hapoh u pud u sam jong ka shnong Mawryngkneng.
“Ka jingpyrshah ka long ba ka Checkpost ka wanrah ïa ka jingthud ïa ka leit ka wan jong ki paidbah namarba ka dei ka surokbah National Highway ïa kaba ki nongshong shnong ki ju ud na ka por sha ka por,” la ong u Sordar jong ka shnong Mawryngkneng Bah Peter Lawai ha ka jingïakren bad ki lad pathai khubor ha Shillong Press Club.
“Ka tnat Pulit ka aidaw ba hap ban talasi ïa ki trok kiba kit beain ïa u dewiong bad ngi la ïakren ruh bad u Superintendent of Police hynrei u ong ba hap ban buh beit ïa ka Checkpost,” ong u Bah Lawai.
“Ngi kyrpad ïa u MLA ba un ym leh ïa kane ka kam kaba long pyrshah ïa ka rai jong ka Dorbar Shnong Mawryngkneng,: u la bynrap.
Katkum ka jingong jong u Bah Lawai, ka Mawryngkneng Police Station ka dang duna ki nongtrei wat ban ai jingshakri ïa ki paidbah bad lada buh sa ïa ka Checkpost ki Pulit kiba dei ban peit ïa ka shongsuk shongsaiñ, ban ai jingïarap ha ki jingïarap ba kyrkieh ki hap ban bunkam noh ha ka Checkpost bad kin ym lah shuh ban ai jingshakri shi spah na ka shispah.
“Ka jingdon jong ka Checkpost ki Pulit kin ym don por shuh wat tang ban leit pahara ha iew ha hat, ha ki shnong ki thaw, ha surok bad ngi ïohi ïa ka jingjyllei ki jingshah tuh masi, tuh sniang ha ki shnong ki thaw, ki kali ba ïaid ha ka surok National Highway ki shah lute, ki nongniah kali ki shah shoh bad shah pynmynsaw. Kane ka dei kaba ngim kwah ban don ïa ka Check post,” la pynpaw u Sordar ka shnong Mawryngkneng.
“Haba don kino kino ki jingjia bad ki jingkulmar ha ki shnong ki thaw bad ki jingjia bapher bapher khamtam haba ïohkem ïa ki nongkhaii drok bad ki nongdih drok lada ngin pyntip sha ki Pulit ka jingjngai kaba tang 50 mitar kan bam por shiteng kynta haduh shi kynta ban ïoh jubab. Ka daw ka long ba ym don briew bad ki briew ki don lut ha Checkpost.
Lada ka long ha kane ka dur, ka Police Station kaba don ha Mawryngkneng kan ai jingshakri tang ïa ka Check post ne kan ai jingshakri ïa u paidbah,” la buh jingkylli u Bah Lawai.
“Lada ki ong ban talasi ïa ki briew kiba wan nabar, ha Byrnihat ka don ka Anti-Infiltration Check Gate, ha Ratacherra ka don ka Anti-Infiltration, kata ka dei ka kamram jong ki (Pulit) bad lada ki sngew ba ka don ka jingma ban kem ïa kino kino kiba suba sniew shipor ki lah ban buh ïa ki Checking Point,” u la ong bad bynrap.
Halor kane ka jingpyrshah ïa ka Checkpost, u Bah Lawai u la ïathuh ba kum ki nongïalam shnong kin sa leit pynsngew hakhmat ka Director General of Police ka Jylla ka Kong Idashisha Nongrang.
“Lada ka tnat Pulit, ka tnat Kam Pohïing bad u MLA ki leh pyrshah ïa kane ka jingpyrshah jong ka Dorbar Shnong ngim banse na ka liang jong ki nongshong shnong ngin ym ïashim bynta shuh ha ki jingïalang bad ka tnat Pulit hapoh ka Mawryngkneng Police Station.”
U la ïathuh ba ka jingmut jong ka Dorbar Shnong ka long ban pynkhlaiñ ïa ka jingdon jong ki nongtrei ha Mawryngkneng Police Station namar ka jingkharoi ki jingsniew na ka jingjyllei jong u drok. “Ngi ai jingmut ruh ba ka Sorkar ban buh noh da uwei u Officer on Special Duty bad ki Staff jong u ban peit beit thik tang ïa ka NDPS Case. Kumno ujuh u ophisar un peit ïa ka Criminal Case, Civil Case, Drug Case. Ka thaiñ Mawryngkneng ka dei ïa ka National Highway bad nongdie drok kiba nabar ki wan na ka por sha ka por bad ki pynjah burom ïa ka shnong ka thaw namarba ngim shym la ïohi ba ka Sorkar kan buh beit thik tang ïa u ophisar uba peit beit thik tang ïa u drok,” u la ong shuh shuh.
U la ai jingmut ruh ïa ka Sorkar ba kan kyntiew ïa ka jingïarap pisa ïa ki Village Defence Party (VDP) namarba ki she jingeh ban treikam lada ym don ki lad jingïarap.
Shuh shuh u la ong ba ka Dorbar Shnong ka la kyntu ïa ka tnat Pulit ban pynkhlaiñ shuh shuh ïa ka Women Police Cell ha Mawryngkneng Police Station bad ban ki Pulit pynïaid kali ban telakam ïa ka jingniah stet ki kali ban lait na ki jingjia ba sngewsih ïa ki paidbah ha surokbah.
