Shillong, Jylliew, 23: Ka lympung iamir jingtip la pynlong ha Sngap Sing College ban rakhe ia ka lyngkhuh 183 snem jong ka jingwan iuhkjat u Thomas jones ha Ri Khasi ba la pynkhreh da ka shnat Mawkyrwat jong ka Khasi Authors’ Society. U nongmihkhmat sha Dorbar Thawain Jylla, u Bah samlin Lyngdoh Tongkhar u la long u kongsan ha kata ka sngi rakhe bad u kren mardor halor ka jingdonkam kyrkieh ban ioh ka jingithuh ia ka ktien Khasi ban kynthup ha ika Khyrnit Baphra jong ka Riti Synshar ka Ri India.
Ki riewtbit ba la wer ban kren halor u Thomas Jones ki kynthup ia u Pastor G P L Kadew bad Lyngdoh Ioannis War Pakma ki ba la pynkheh ki jynthoh halor ki phang ba la aiti ban kren ha kata ka sngi rakhe. U Pastor Kadew u la kren sani halor ka mynsiem sngewlem jong u Thomas Jones ia ki Khasi ki ba la shah thombor ha ka sorkar Bilat.
U la kdew ba kumno u Thomas Jones u la kyntiew ia ka imlang sahlang jong ki paidbynriew Khasi khamtam ha ka kamai kajih bad ka pule dangle, namar ba u ngeit ba ka ba ialap ia ka khubor babha jong ka balang Khristan kan urlong tang lada ki kam sngewlem ki ktah ia ka dohnud jong ki paidbah.
Kumta u la adkar ban hikai niam bad kham khluh ban hikai ha ka trei ka ktah ban kamai kajih bad ban hikai ia ka jingnang jingstad kum ka atiar ban kyntiew ia ka jingim briew ha ka imlang sahlang. U Lyngdoh Ioannis War Pakma u la sot na ki nongthoh ba pawnam jong ka jaitbynriew Khasi ban phalang ia ka iitkhmih jong ka jaitbynriew lyngba ka jynthoh jong ki, khamtam ki symboh pyrkhat jong u Myllung Soso Tham, Rabon Sing Kharsuka bad kiwei kiwei.
U Lyngdoh Pakma u la ban jur halor ka aiom ksiar kum ka pharshi ka ba phalang ia ka jinglong briew ba bha ha ka ba iadei bad ki parabriew ha ka imlang sahlang. Ka kynhun Iong Lajong ka la rwai sngewphieng halor ka lungkhuh snem u Thomas Jones kum ka dak ban nguh burom ia ka nam jong u kum u nongshem ia ki dak thoh Khasi.
