Shillong, Naitung 05: U Bah Deimaya Lang Siangshai uba dei u Editor jong ka Kotkhubor Mawphor, ha ka sngi Thohdieng u la shah jied kum u President ba thymmai jong ka Shillong Press Club (SPC) ha ka elekshon ba la pynlong da ka Directorate of Information and Public Relations (DIPR) ka Sorkar Jylla.
Katba u Bah Dominic Savio Diengdoh uba long u trai jong ka lad pathai khubor T7 News Channel u la shah jied kum u General Secretary khlem da don mano mano ruh ba ïaleh pyrshah, katba u Bah Gershome Hat uba dei u Editor jong ka Kotkhubor u Peitngor u la shah jied kum u Treasurer.
Ki dkhot ka Shillong Press Club kiba la poi ban ïashim bynta ha ka jingïathep vote ki long 164 ngut na ki 188 ngut.
Ha ka jingniew ïa ki vote shikynta hadien ba ladep ka jingthep vote, u Bah Deimaïalang Siangshai u la jop da kaba ïoh khur 91 vote, katba u Bah Jeo Thangkhiew bad u Bah Raphael Warjri kiba ïakhun pyrshah ki la ïoh khur mar 67 vote bad 6 vote.
U Bah Gershome Hat uba la ïoh 113 vote da kaba pynliem ïa u Bah Martin Nongkhlaw uba la ïoh khur 50 vote.
U Director jong ka DIPR, u Malthus Sangma, u la aiti ïa ki syrnot sha kine ki lai ngut kiba la jop ha kane ka elekshon.
Ha kajuh ka por u la ai khublei ïa baroh ki nongthoh khubor baroh kiba la ïatreilang na ka bynta ban pynlong ïa kane ka elekshon kaba ïaid beit ïaid ryntih.
