Shillong, Naitung, 06: Saw ngut ki briew ki la shah pynïap dusmon ha ka rukom kaba ishyrkhei bha hapoh ka shnong Umpleng, East Jaiñtia Hills ha kaba ia ki kti ki kjat la teh da u tyllai bad nalor kata la lap ruh ia ki dak pom tari ha ka met jong kine ki saw ngut.
U Superintendent of Police jong ka East Jaiñtia Hills District ha u kyrwoh ba la phah sha ki lad pathai khubor ha ka sngi Saitjaiñ u la ïathuh ruh ba uwei na kine kiba la shah pynïap u dei uba la ithuh kyrteng kum u Ravi Rai, 23 snem ka rta bad uba dei u khun jong ka Devi Rai uba shong basah ha ka shnong Pastha Elam jong ka ri Nepal.
Katba uwei pat u dei u Khasi-Pnar ïa uba la tip kyrteng kum u Nasar Kyndait, 33 snem ka rta na ka shnong Dkhiah East Pohshnong. Sa arngut kiwei pat ki dei na ka jaidbynriew Nepali ia kiba ym pat lah satia ban ioh kyrteng.
U SP u la pyntip ba ka tnat Pulit ka la thung da ka Special Investigation Team (SIT) ban ïarap ïa u Investigating Officer (IO) na ka bynta ban pynlong shuh shuh ïa ka jingtohkit kaba bniah halor ka jingshah pynïap jong kitei ki saw ngut ki briew ha kaba ïa ka met jong kine ki saw ngut ba la teh da u tyllai na ki kti la bret ha kawei ka jaka kaba don ha lyndet jong ka iew Umpleng ha East Jaiñtia Jaiñtia Hils District.
U la ïathuh ba ki Pulit jong ka Umpleng Anti-Dacoity Camp ki la ïoh jingtip halor kane ka jingjia ha ka sngi Saitjaiñ ha ka por 7.30 baje mynstep ba la pyntip ba ki don saw tylli ki metïap jong ki briew ki bym lah ban ithuh ba la lap ha lyndet jong ka iew Umpleng.
Mar mar, ki Pulit ki la leit sha ka jaka ba lap ïa ki metïap ha kaba ki la shem ba la teh ïa ki kti da u tyllai bad lap ïa ki dak ot ha ka met jong ki saw ngut ïa kaba la ngeit ba ki la shah pynïap bad hadien kane ki Pulit ki la pyntip sha ka Crime Scene Unit, sha ka Mobile Forensic Crime Scene Unit bad sha u Majistor ban leit pynlong ïa ka jingtohkit kaba bniah ryngkat ka jingdonlang jong ki nongsakhi ban lum ïa ki sakhi satar bad ban pyndep ïa ki jingdonkam katkum ka aiñ.
Hadien kane, ïa ki saw tylli ki metïap la pynkit noh sha Civil Hospital Khliehriat na ka bynta ban leh ïa ka post mortem.
Shuh shuh ka thymmei khubor ka la ïathuh ba kine kiba shah pynïap la suba ba ki dei kiba nongdie bad ki nongdih drok namar na ka jaka ba la lap ïa ka metïap jong ki, ki Pulit ki la lap ruh ïa ki thyrnia injek.
