Shillong, Naitung 07: Ki Pulit ka jylla kim pat lah satia ban ïohkem ïa ki riew bymman kiba donkti ban pynïap dusmon ïa ki saw ngut ki briew ha kaba la lap ïa ki metïap ha ka shnong Umpleng, East Jaiñtia Hills District.
U Addl. SP Bah Banraplang Jyrwa ha ka sngi U Blei u la pyntip ba haduh mynta la lah ban ithuh tang ïa ki lai ngut kiba la tip kyrteng kum u Ravi Rai (23) na ka shnong Elam, Mechipradesh, Nepal, u Rajesh Rai, 26 snem na ka shnong Dharan Sunsari, Koshi Anchal, Nepal bad u Nasar Kyndait (33) na ka shnong Dkhiah East Pohshnong, East Jaiñtia Hills District.
U la ïathuh ba ki Pulit ki la rejister da ka Criminal Case ha Khliehriat Police Station.
“Ka jingtohkit haduh mynta ka dang ïaid shakhmat,” ong u Addl. SP.
Ha ka sngi Saitjaiñ, ki paidbah ka shnong Umpleng ki la lap saw tylli ki metïap ba la shah pynïap dusmon ha kaba la teh lang ïa ki kti da u tyllai bad la pom dusmon da ki kynja tiar ba nep na ka met.
Halor kane ka jingjia ki Pulit ki la thaw ruh da ka Special Investigation Team (SIT) ban ïarap ïa u Investigating Officer (IO) uba shah pynkhamti ban tohkit halor kane ka jingjia.
