Shillong, July 08 : Kum uwei na ki nongshong shnong uba don ka jingkithlieh na ka bynta ka thain Ri-War, u bah R Monarch Shabong na ka shnong Umniuh Tmar uba dei ruh u Editor jong ka kot khubor jong u ‘Rupang’, u la thoh sha u Myntri Rangbah ka jylla u Conrad K Sangma ban pynpaw ka jingsngewkhia halor ka jingtuid ei ki khyndew sboh na ki thain khappud ka thain Ri War sha ka ri Bangladesh.
U la pynkynmaw ba naduh u snem 1990 ka Ri War Mihngi Development Council ka la ia kren bad ka sorkar lyngba ka tnat Soil and Water Conservation ban tei da ki kynroh ha ki bri ki bsah jong ki briew khnang ba ka khyndew kan ym tuid ei sha Bangladesh. Ha katei ka por ka sorkar ka la mang pisa ruh ban pyntyllun ia kane ka kam hynrei mynta kane ka jingthmu ka sorkar kam shym la poi shano shano ruh.Une u rangbah u la phah ia kane ka jingthoh ka dei namarba ka jingtuid ka khyndew sboh kam dei tangba ka ktah ia ki jingthung jingtep hynrei ka ktah bha ruh ia ka jinglong jingman ka suinbneng namarba ka jingshah rat ki dieng ki siej, ka pyntyrkhong ia ka mariang bad ka jingshit ka sngi ruh ka nangjur bad nalor kata ka pyntyrkhong ruh ia ki tyllong um.
U Bah Shabong u la pynskhem shuh shuh ia kane ka jingthoh jong u da kaba bsuh lang ia ka kaiphod ba la pynmih da ka ka Indian Institute of Technology, New Delhi ia kaba la wad bniah da u Ravi Raji bad u Manabendra Saharia bad ha kane ka kaiphod kaba pyni ia ka jingshah ktah kiba bun ki jylla, la pyni ruh ba ka East Khasi Hills ha kane ka jylla jong ngi ka dei kaba shah ktah eh.
Ha kane ka kaiphod ka pyni ba ka jingduh ia ka jingkhyndew ha ka shisnem ka long haduh 164. 52 Million ton ha ka shi hektar ha ka shisnem. Kumta u la kyrpad ia u Myntri Rangbah ba un shimkhia ia kane ka kam da kaba ia kren ruh bad ka sorkar India ba kan wad ia ki lad ki lynti kumno ban khanglad ia ka jingtuid ei ki khyndew sboh sha Bangladesh.
