Shillong, Naitung, 09: Ki Pulit jong ka Nongstoiñ Police Station ha ka sngi Saitjaiñ jong ka taïew baladep ki la kem ïa u Albertstar Nongphud, 43 snem ka rta uba la phetrieh hadien ka jingthang ïa la ka jong ka ïing, ïa ki tiar ki tar, ki jaiñ ki nep bad wat ïa ki kot skul jong ki khun.
Ia une u kpa runar ki Pulit ki la ïoh kem na Nongstoiñ.
Ki Pulit ki la ïathuh ba une u briew u la leh ïa kane ka kam bymman ha ka 5 tarik mynta u bnai ha ka shnong Phudumbah Sepngi, West Khasi Hills.
Ki la ïathuh ba ha ka por 1:00 baje mynstep, une u briew u la sei ïa ki tiar ki tar na ïing ba bret lut sha phyllaw ha kaba u la wiang ding ïa ki. Hadien kane u la thang sa ïa ka ïing kaba ma u bad ka kurim lem bad ki khun ki ïa shong ïa sah.
Ki bahaïing hasem jong ka kurim, ki la mudui da ka ejahar ha ki Pulit bad ia kpa runar ki Pulit ki la tian bishar ha kashari kaba la ai jingbit ia ki Pulit ban set ïa u hapoh ka Judicial Custody na ka bynta ban ioh pynlong ia ka jingtohkit kaba bniah.
