Shillong, Naitung, 21: U MP jong ka Voice of the People Party uba mihkhmat na Shillong Parliamentary Seat u Dr. Ricky AJ Syngkon ha ka sngi Saitjaiñ u la ong ba ka jingïoh rung jong ka VPP ha Parliament kan long kum ka tyndong jingpynsawa sha ka ri India baroh kawei ïa ka jinglong jingman jong ka synshar ka khadar kaba la synjor.
“Nga ju ïai kren na ka por sha ka por, nga ainguh ïa u Blei na ka bynta kane ka lad ka lynti ba u plie ïa nga, nyngkong kum u shakri jong u bad kum u dkhot jong ka Parliament da ka jingkyrshan jong u paidbah ban ai ka jingjop ïa ka VPP ha ka elekshon Lok Sabha ba ladep ban mihkhmat ïa ka Shillong Parliament Seat bad ïa ka jaidbynriew Khasi-Jaiñtia hi baroh kawei,” u la ong.
“Kane ka kam kaba nga la shim kum ka rai rangbah na ka daw ka jinglong jingman jong ka jylla jong ngi, ka pynkhih ïa nga, nga long u nonghikai bad ngam ju ïadon bynta ha ka politik mynno mynno bad haba nga ïohi ïa ka jinglong jingman ngam lah ban shah bad nga don ki skhor ban sngew bad ki kjat ban leit kylleng kylleng ka pynkhih ïa ka dohnud jong nga bad ka wanrah ruh ha nga ïa ka mynsiem jong ka jingsngewkhia bad kum u nonghikai nga shim ïa ka jingkitkhlieh ym tang ïa ki khynnah hynrei nga hap ban pyrkhat khamtam eh ïa ka lawei,” la ïathuh u Dr. Syngkon.
“Kumto ngi la rai bad ka party ka la jied ban pynïakhun da nga bad ngi la jop bad sha Delhi kumba nga ju ong, ngam ju sngew long marwei mynno mynno ruh. Kawei, nga don ïa u Blei uba nga shaniah bad nga don ïa ka jaidbynriew kaba la ai ha nga ïa ka jingshaniah. Kumta ngam ju sngewlong marwei,” u la bynrap.
“Ha ka jingkren jong nga ha Parliament nga ïeng ban kren ïa ki nongrim kiba ka jaidbynriew ka donkam bad nga ïeng ruh ban kren ïa ka jinglong jingman jong ka synshar ka khadar ym dei tang ha kane ka jylla jong ngi hynrei ha kylleng ka ri India hi baroh kawei ba ka don ka synshar ka khadar kaba synjor haba pynshong nongrim ïa ka, katkum ka riti synshar jong ka ri India. Kumta, ngan ïai ïeng na ka por sha ka por ban kren ïa ki jingshisha bad nga kyrmen skhem ba ka jingdon jong ka Voice of the People Party ha Parliament kan long kum ka tyndong jing pynsawa sha ka ri India baroh kawei ba ka ladei ka por ba ngi kwah ban ïohi ïa kata ka ri India kaba kiew rasong bad ka ri India kumba ong u Myntri Rangbahduh u Narendra Modi ba ka ri India kan dei ka ri kaba kiew shaphrang shwa u snem 2027. Ngin ym lah ban poi sha kata, lymda ngi don ïa ka jingïaburom iwei ïa kiwei ïa ki ritpaid bad kumjuh ruh ban don ka jingkynthup lang baroh ha ka jingangnud jong ka Sorkar ban ïohi ïa ka ri India kum ka ri kaba la kiew shaphrang.
Haba kylli la ka don neem ka jingthep vote ha ka jingjied ïa u Lamphang jong ka Parliament, u Dr. Syngkon u la jubab da kaba ong, “kam don eiei kaba kum kata. Ka jingkylli ban ïashim bynta (ha ka jingthep vote) ruh kam don. Nga ieh ïa phi ki lad pathai khubor ban da pynshisha ïa kiei kiei.”
Halor ka jingkylli kaei kaba ka VPP kan ai jingshakri ïa u paidbah haba kam shym la ïatreilang hapoh ka Sorkar ha ka Jylla bad ha Delhi, u Dr. Syngkon u la jubab da kaba ong, “kiba don hapoh ka sorkar ruh ki dei ki shakri jong u paidbah, ki saw ngut ki MLP jong ka VPP bad ma nga kum u MP sha Parliament. Ka kamram jong ki shakri, la ka long ha ka liang synshar ne ka liang pyrshah, ka long ban trei na ka bynta ki kynrad.”
Haba kylli, u la ong shuh shuh, “kam pher bad kam da dei eh ba ngin don ha ka liang synshar ne ka liang pyrshah ban ïeng marwei leilei ka long kaba ngi sngew sarong namarba ngi wanrah ïa ki mat kiba ka jaidbynriew ka donkam.”
“Lada phi peit ha ka Manifesto jong ngi ki don saw tylli ki mat kiba ngin rah bad ngan kren ha ki jaka ki bapher bapher,” u la ong shuh shuh.
