Shillong, Naitung, 31: Ka Hynñiewtrep Youths Council (HYC) ka la dawa ïa ka ophis Defence Estate Officer, Guwahati ban kyndang ïa ki poiwir kiba sah be-aiñ ha Lum Survey bad ban pynpra lut naphang ïa ki iing sah be-aiñ hadien ka 19 tarik, Nailar, 2024 ka sngi ba ka Ingbishar kan pynmih ïa ka rai halor kane.
Ka jingsahteng jong kane ka kam, ka long hadien ba ki lai tylli ki longiing ba sah ha Lum Survey ki la mudui da ka mukotduma sha ka Iingbishar.
Kum ban shu pynkynmaw ha ka 23 tarik, Jymmang mynta u snem, hadien ba la lap ïa ka jingdon jong ki briew kiba sah beaiñ ha Lum Survey kiba don kumba 80 haduh 100 tylli ki longiing ka HYC ka la leit pynpra ïa ki ing bad beh lut ïa ki poiwir kiba sah beaiñ.
Ka jingheh jong ka jaka ba la sah be-aiñ da ki poiwir ka long kumba 0.248 acres lane 24,000 hajar sq.ft.
Hadien ka jingleit pynpra da ka HYC ïa ki iing sah beaiñ, ki Pulit ki la pynngat lai tylli ki case hapoh ki kyndon jong ka Indian Penal Code (IPC) ïa u President ka HYC, ïa u Vice President Bah Donboklang Dkhar bad ïa u Secretary Bah Isaac Basaïawmoit.
“Kato ka jaka ka dei kaba ju pynmih shibun ki kam beaiñ khamtam ha kane ka sor Shillong kumba ka seng ka lap ba ka dei ka jaka shalan ïa u drok ha Sor Shillong bad ki don ruh ki nongdie drok kiba sah ha kane ka jaka (ha Lum Survey), la ong u President ka HYC u Bah Roy Kupar Synrem ha ka jingïakren bad ki lad pathai khubor hadien ba la kut ka jingïalang ba la khot da ka Deputy Commissioner jong ka East Khasi Hills ha ka sngi Balang.
Ha ka jingïalang, la ïashim bynta da ki nongmihkhmat na ka ophis Defence Estate Officer, Guwahati bad na ophis u Superintendent of Police.
U la ïathuh ba ka seng ka la lap sabut lyngba ka jingïoh ïa ki dur jong ki briew kiba donkti ban die ïa u drok ha surok bad ha kiwei kiwei ki bynta jong ka Sor Shillong bad ynda la mih ki leit sah ha Lum Survey.
“Hadien ka 23 tarik, Jymmang, ngim shym la ïoh shuh ban leit rung ha Lum Survey namarba ki bor Pulit ki la ap pahara hynrei kumba ngi ong naduh ba sdang ngi kwah ban ïohi ïa ka jingpynpra bapura ban pynkhuid ïa kato ka jaka baroh kawei,” u la ong.
“Ha ka jingïalang la pyntip ïa ngi da ka ophis Defence Estate Officer, Guwahati ba ka don ka Stay Order ba la pynmih da ka kashari District and Session Judge, Shillong halor ka mukotduma ba la ujor da ki lai ngut ki trai jaka. Ka ophis Defence Estate Officer, Guwahati kum ka trai jaka ka kwah ban pynkhuid lut ïa baroh. Ka la pyntip ruh ba ka Ingbishar kan sa pynmih ïa ka rai ha ka 19 tarik Nailar, 2024. Hadien kata, yn lah ban leh eiei,” u la ong.
Shuh shuh u la ïathuh ba hadien ka 19 tarik, Nailar, lada jia ba ka ophis DEO kam lah ban leh eiei ka seng banse ban shim da ka sienjam kaba tyngeh.
