Shillong, Nailar, 03: Ka Khasi Students Union (KSU) ha ka sngi Saitjaiñ ka la khot bad wer ia ki 13,451 ngut kiba iakhun ia ka ïakhun ïa ka MCS Premilinary Examination ba kin thoh sha ka ka Meghalaya Public Service Commission (MPSC) ba kim don kano kano ka jingujor lada pynmih paidbah ia ki Marks.
Ka KSU ka la kynnoh ruh ba ka MPSC ka dei ktem jyrsieh kaba jaboh tam bad ong ruh ba kum ka seng kam sngewdon jingmut shuh ban leit ïakynduh biang ïa u Chaiman jong ka Commission ha kaba ïadei ba ki samla kiba ïakhun ïa ki kam MPS, MCS namarba u Chairman um shym la bat ia ka kular hadien ka Commission ka la kyntait ïa ki jingkyrpad jong ka seng ban pynmih ïa ki Marks jong kiba ïakhun ïa ka eksamin MCS Premilinary Examination.
Ha ka jingïakren bad ki lad pathai khubor ha Shillong Club, u Chairman jong ka Employment Monitoring Cell ka KSU u samla Reuben Najiar u la ong ba ka seng kam sngew don jingmut shuh ban leit ïakynduh ïa ka MPSC hynrei kaei kaba ka seng kan shim ïa ka sienjam mynta ka long ban kyntu ïa ki 13,451 hajar tam kiba aplai ïa ka MCS ba kin mih shakhmat ban thoh da ki aplikeshon sha ka MPSC ban pynpaw ba kim pyrshah ne sngew eiei ban pynmih paidbah ïa ki Marks ba ki ïoh ryngkat lang bad ki Roll Number.
“Kaei kaba donkam mynta ka long ba ki samla kiba aplai ïa kine ki kam ryngkat lang bad ki kmie ki kpa ki dei ban mih shakhmat ban thoh da ka aplikeshon sha ka MPSC ban pynpaw ba ki kwah ban pynmih ïa ki Marks ba ki ïoh bad ki roll number khnang ban lah ban pynduh jait syndon ïa ka bamsap bad ka jingshah liang kaba don hapoh kane Commission,” ong u samla Najiar da kaba kyntu ruh ïa ki samla hadien ba ki ladep ban thoh ïa ki aplikeshon ki dei ruh ban phah sha ka email jong ka seng: khasistudentsunion1978@gmail.com ba ka seng seng ruh kan dup tip.
Ha kaba ïadei bad ki hynriew ngut kiba ïakhun ïa ka eksamin kiba la phah ïa ki aplikeshon sha ka seng ba kim kwah ban pynmih ïa ki Marks, u Chairman jong ka Employment Cell u la pynpaw ïa ka jingsngew phylla ban ïohi ba ka rukom thoh ka long kumjuh bad kane ka pyni shai ba ka don kaei re kaei kaba shalyndet.
U la ong ba ha ka jingpynlong ka jingmareh halor ka kam MPS ha u snem 2019 ka MPSC ka la pyllait bad pynmih ïa ki Marks bad kumjuh ruh ïa ki kyrteng, hato kane kam pynkheiñ ïa ka Article 21 jong ka riti synshar ka ri India? Kumta kan eh aïu ïa ka Commission ban pynpaw ïa ki marks bad ki roll number jong ka eksamin MCS? u la buh jingkylli ïa ka Commission.
Halor kitei ki 6 ngut kiba ïakhun ia ka eksamin bad kiba pyrshah ban pynmih kyrteng, u samla Najiar u la kynnoh ba ka MPSC ka ai da ki kyrteng kiba lamler khlem ka address khlem roll number. Halor ka shithi pat ba la phah da kiba ïakhun ïa ka eksamin ba la phah sha ophis ka seng, u samla Najiar u la ïathuh ba dei kaba shisha hynrei na ka liang ka seng kam lah pat ban pynshisha mano kiba thoh namarba ki khlem pynpaw kyrteng hynrei u la ong ba ka seng ka ngeit ba kane ka dei kaba la jia shisha hapoh ka MPSC.
“Ha ka shithi la pynpaw ba ka don kawei kaba ïakhun kaba dei ruh ka khun kynthei jong u Secretary ka MPSC kaba la mih ruh ha ka kyrteng jong ka 2ndAdditional List na ki 62 ngut kiba ïakhun ia ka eksamin bad lada ka long ha kane ka rukom ka pyni ba ka don ka jingshah liang bad ka jingleh bakla kaba la paw pen ryngkew,” u la ong.
U la buh ruh ka jingkylli ba ha kano ka rukom ka MPSC ka pdiang ïa kine ki aplikeshon kiba khlem kyrteng.
“Kumta kumba ka la paw mynta ngi suba jur ba ka MPSC ka dei ka ktem jong ka jingjyrsieh ba jaboh tam bad dei halor kane ngi kyntu ïa ki kmie ki kpa jong ki 13451 ngut ki samla ba kin mih shakhmat ban thoh aplikeshon sha u Chairman ban pynpaw ba kim don jingpyrshah ban pynmih ïa ki marks ha ryngkat bad ki roll number khnang ban lah ban pynduh jait ïa ka bamsap bad khnang ba ngin lah ban pynkylla bad thaw thymmai ïa ka MPSC,” u la bynrap.
