Shillong, Nailar, 10: Ka Sorkar Jylla ha ka sngi Saitjaiñ ka la ai por sa 15 sngi ïa ka Harijan Panchayat Committee (HPC) ban shim ia ka rai kaba khatduh ha kaba ïaei bad ka jingpynkynriah ïa ki 342 tylli ki longiing na Them Iew Mawlong.
Ïa kane ka rai la shim ha ka jingïalang ba la pynïaid da u Symbud Myntri Rangbah uba peit ïa ka tnat Kam Pohing u Bah Prestone Tynsong ryngkat ka jingdon lang jong u Symbud Myntri Rangbah ka Jylla uba peit ïa ka tnat Pynroi Sor u Bah Sniawbhalang Dhar bad ka kynhun jong ki nongïalam ka HPC bad ka Delhi Sikh Gurudwara Mangament Committee (DSGMC).
Haba kren sha ki lad pathai khubor, u Bah Dhar u la ong ba ka jingïalang ka la long kaba seisoh
“Ngi la mynjur ban ai por ïa ki sa 15 sngi na ka bynta ban shim ïa ka rai kaba khatduh bad ban pyntip sha ka Sorkar Jylla,” ong u Bah Dhar ha ka jingïakren bad ki lad pathai khubor hadien ba la wai ka jingïalang bad bynrap, “hadien kata, kan ym don shuh kano kano ka jingïakren.”
U Bah Dhar u la pyntip ba ka HPC ka la pan por sa 15 sngi namarba ka kwah ban dang ïakren sa katto katne ki bynta bad ban pynsngewlang sha baroh. “Kin (HPC) sa pyntip sha ka Sorkar la ka rai ka long kaba biang ne kam biang bad ngi kyrmen skhem ba kin shim ïa ka rai kaba dei. Ngi kwah ïa ki ban ong haoid ne em (halor ka jingtyrwa ïa ka jingpynkynriah),” u la ong.
U Symbud Myntri Rangbah u la ong ba ka HPC ka la mynjur ruh ïa ka Blueprint ba la pynkhreh da ka Sorkar.
Lah ban kdew hangne, ka Sorkar ka la wanrah ïa ka Blueprint hadien ba la kyntait ïa ka jingtyrwa jong ka HPC ha ka 25 tarik Ïaiong, 2022 ban ai jaka 200 square meters sha manla kawei pa kawei na ki 342 tylli ki longing hapoh ka European Ward bad ban bei ruh ïa ka jinglut jingsem ha kaba shna ïa ki iingsah ki jong ki.
Ha ka 31 tarik Nailar, 2022, ka Sorkar Jylla ka la pynbna ïa ka rai ban shna da ki ing mala ha ka jaka kaba heh 2.5 acre kaba dei jong ka Shillong Municipal Board na ka bynta ban pynkynriah ïa ki 342 tylli ki longiing.
Haba kylli, u Bah Dhar u ong, “bun tylli ki mat ngi la ïakren bad ki long kiba seisoh. Hynrei ka HPC ka dang donkam ban dang ïathir ïatai bad ki bor ba halor jong ki bad namarkata ngi la ai por sa 15 sngi.”
U la kren shai ruh da kaba ong, “yn ym pynlong jingïalang shuh hadien ki 15 sngi. Ngin sa pyndep bad shim rai lut hapoh ki 15 sngi.”
Shuh shuh u Bah Dhar u la kren ruh da kaba shai ba ka Sorkar kan ym sngap satia ïa ki bor kiba nabar. “Ka jingïakren ka long beit tang hapdeng ka Sorkar bad ka HPC, kam shym don kano kano ka jingsngap ïa ki bor kiba nabar…” ula ong.
Shwa kane, u General Secretary jong ka Delhi Sikh Gurudwara Mangament Committeeu Jagdeep Singh u la ong, “ngi la ïakren sani bha halor ka jingpynkynriah ïa ka Punjabi Lane. Mynta, sa shisien pat, ka jingïakren ka la long kaba seisoh bad kin dang don ruh katto katne k mat ba ngin dang ïathir bad na kata ka daw ngi la pan por sa 15 sngi.”
“Hadien ka 15 sngi, ngin sa phah ïa ka rai kaba khatduh ban shim syndon ïa ka rai,” u la bynrap.
