Shillong, Nailar, 10: Kum shi bynta ban pynsah nam ïa u khla wait ka jaitbynriew Khasi, ka Tripura Tribal Area ka la shah sngewbha ban jer ban thoh ïa ka kyrteng jong u Syiem Tirot Sing Syiem ha English School ban sa tei ha North Tripura.
Ïa kane la pyntip da u Chairman jong ka Tipra Motha Party u Pradyot Deb Barma hadien ba la wai ka jingïalang jong ki 10 tylli ki Autonomous District Council (ADC) ka thaiñ shatei lammihngi kaba la long ha Tripura Castle, ha nongbah Shillong ha ka sngi Saitjaiñ.
Ha ka jingïakren bad ki lad pathai khubor hadien ba la wai ka jingïalang, u Pradyot u la pynpaw ba la rai ruh ban ai jaka ïa ka Khasi, Jainti bad Garo Hills Autonomous District Council ha Tripura ba kin shna ïa ka Bhavan khnang ban pynkhlaiñ shuh shuh ïa ka jingïadei hapdeng ki jaidbynriew riewlum ka jylla Tripura bad ki jaidbynriew riewlum jong ka jylla Meghalaya.
U la ïathuh ruh ba ki riewlum ka Tripura kin sa jaka ha Agartala kaba dei ka nongbah jong ka Tripura ban shna ïa ka ophis jong ki lai tylli ki ADC jong ka Meghalaya nalor kaba tei ruh ïa u dur mot jong u Rev. JJM Nichols Roy uba dei u Kpa jong ka Khyrnit Bahynriew jong ka Riti Synshar jong ka Ri.
Ha kane sngi, u Symbud Myntri Rangbah ka Jylla u Bah Prestone Tynsong bad u Chairman jong ka TIPRA Motha Party u Pradyot Deb Barma ki la plie paidbah ïa u mot jong u Rev. JJM Nichols Roy ha Lariti International Centre for Performing Arts and Culture (LICPAC) kaba don ha New Shillong ha ryngkat ka jingsakhi lang jong ki MDC bad ki CEM jong ki 10 tylli ki Autonomous District Council (ADC).
