Shillong, Nailar, 12: Saw ngut ki briew ki la shah kem ha ki Pulit jong ka Mawryngkneng Police Station, East Khasi Hills District ha ka lah Sngi u Blei halor jingïasylla ban lute bad ban rong tuh ïa ki nar rod.
Ki Pulit kiba la register case kam bymman hapoh ka Mawryngkneng Police Station hapoh ka Section 309 (4)/137 (2) BNS ha ka jingtohkit kaba bniah ki la kem ïa ki saw ngut ki briew kata ïa u Deibormi Mukhim, 40 snem, u Robert Shadap 25 snem, u Babiangbor Mylliem 38 snem bad ïa u Shopstarwell Jana 35 snem.
U Superintendent of Police jong ka East Khasi Hills u Bah Sylvester Nongtnger ha u kyrwoh ba la phah sha ki lad pathai khubor u la ïathuh ba ha ka 9 tarik mynbta u bnai ki Pulit ki la ïoh pdiang ïa ka ejahar ba la ujor da u Bah Deibormi Mukhim bad da u Bah Robert Shadap ha kaba ki la kam ba ha ka 8 tarik mynta u bnai katba ka kali jong ki kaba don ïa ka nombar NL-01-K-6051 (12 shaka) kaba kit ïa ki nar rod TMT ba la pynieng ha surok Mawryngkneng By-pass, saw ngut ki briew ki bym lah ban ithuh kiba rah da ka tari ki la rung jubor hapoh ka trok ha ka por kumba 8:50 baje mynmiet bad ki la patan jubor ïa ki arngut ki nongniah jong ka trok bad thep hapoh ka kawei ka kali Alto 800 ka bym don nombar satia.
U SP u la ïathuh ba kine ki arngut bad ïa uwei pat u nongniah jong ka trok kaba don ïa u nombar ML-05-T-3858, la bat baroh shimet bad la pyllait ïa ki tad haduh ka step jong ka 9 tarik mynta u bnai ha ka shnong Pynursla.
“Tang shu ïoh jingtip halor kane ka jingjia, ki Pulit ki la pynlong ïa ka jingtohkit; hynrei ha ka jingtohkit, la lap ba u Bah Deibormi Mukhim bad u Bah Robert Shadap ki ladep ban ïasylla lypa ban pynhap ïa ki mar ha ka shnong Pommura bad hadien kata, ki la thep ïa ki tiar ha kawei pat ka trok kaba don ïa ka nombar ML-05-T-3858,” la ïathuh u SP.
Nangta, u SP u la ïathuh shuh shuh, ïa ki mar ba la tuh la ïoh kurup na ka shnong Laitkyrhong bad na ka shnong Jongksha bad baroh ki nar rod TMT ba la ïoh kurup ki long kumba 18.5 ton kiba shongdor kumba T. 9.5 lane 10 lak.
Ka trok kaba don ïa u nombar NL-01-K-6051 (12 shaka) ïa kaba la pyntip ba ka la jah rngai la lap na ka shnong Mukhla, West Jaiñtia Hills bad ïa ka trok kaba don ïa u nombar ML-05-T-3858 kaba la pyndonkam na ka bynta ban leh ïa ki kam runar la ïoh kurup na 7 Mer, Baniun, Upper Shillong.
Ka jingtohkit halor kane ka jingjia ka dang ïaid shakhmat ban pynthikna ïa ki jingshisha baroh, la pyntip u SP.
