Shillong, Nailar, 12: Ki Pulit u Syiem ka Hima Mylliem ki la leit jurip mar mar ïa ki dukan ha Iewduh hadien ba la lap da ka Hynñiewtrep Youths Council (HYC) ba la pynlong kum ki jaka sahmiet jong ki bar jylla bad kumjuh ruh ka jaka pynïakhalai.
U Officer Incharge jong ki Pulit u Syiem Mylliem ha Iewduh u Bah Saiñbor Nongkhlaw ha ka jingïakren bad ki lad pathai khubor u la ong ba ka long kaba sngewsih ban tip ba kum kine ki jingjia kin jia ha Iewduh kaba long ka iew kyntang bym shah ïano ïano ruh ban pynlong kum ka ing basa ban sah miet ne ban leh ïa kino kino ki kam kiba long be-aiñ.
U Bah Nongkhlaw u la ong, manla ka por la ju bthah ïa ki trai dukan ba kim dei ban pynlong kum ka jaka sahmiet ha Iewduh hynrei namarba ki don pat kiba ïaleh pyrshah ladep ban shim ïa ka nombar jong ka dukan ryngkat bad ka kyrteng ïa kaba la phah sha ka ophis jong u Syiem ban leh ïa kaba donkam.
Shuh shuh u la pynpaw ïa ka jingkmen halor ka jinglap jong ka HYC bad u la bynrap ba ki Pulit Syiem kin sa shimkhia shuh shuh ban leh da kaba tyngeh ïa kiba pynkheiñ ïa ki kyndon ba la buh.
