Shillong, Nailar, 19: Ka Joint Action Committee (JAC) jong ka Stone Crusher Owner bad Stone Quarry Owner Worker Association, (SCOSQOWA) East Khasi Hills ha ka jingialang kaba la long ha ka Lah Sngi u Blei ka la rai ba naduh ka 21 tarik mynta u bnai kin sangeh noh ka jingtrei maw trei shyiap tad haduh ba ka Sorkar Jylla kan pynbna da kumwei pat.
Ia kane ka rai la shim ha ka jingialang kaba la long ha Lad Nongkrem ban iakren sani bha halor ka jingkhang jong ka Sorkar ia ka kam tih maw tih shyiap, ha kaba ki kynhun na kylleng ki jaka ki la poi sha kane ka jingialang.
Kane ka jingialang ka la iakren sani ruh halor ki rul ba ka Sorkar ka la pynmih kum ka Quarry Permit ia kaba ki la kyntait ban pdiang hynrei ki la kyntu ia ka Sorkar ba kan wanrah ia ka jingpynbeit thymmai halor kane ka rul ba ka la pynmih.
Ki nongialam jong ka kynhun ki la pynpaw ba kim sngew eiei ia ka jingai Challan ka Sorkar ia kiba khaïi mawshun sha Bangladesh hynrei kum ki trai jylla kiba im kamai jakpoh da kane kajuh ka kam tih maw tih shyiap ki pyrshah jur lada ai Challan.
