Shillong, Nailar 20: Uwei u nongtrei jong ka North Eastern Council (NEC), Shillong uba la 58 snem ka rta, u la shah kem ha ki Pulit halor ka jingkynnoh ba u jrong kti ïa ka nongtrei kaba ïatreilang kaba la 21 snem ka rta.
Ki Pulit ki la kem ïa u nongshah kynnoh ha ka Lah Sngi u Blei hadien ba la mudui ejahar ha Laitumkhrah Police Station.
U Superintendent of Police ka East Khasi Hills District u Bah Sylvester Nongtnger u pyntip ba ïa u Sharma ki Pulit ki la kem na ka ïingsah jong u tang shu ïoh pdiang ïa ka ejahar.
“Ha ka janmiet Lah Sngi u BLei ngi la ïoh pyntip lyngba ka telephone shaphang kane ka jingjia ha kaba u nongtrei ka NEC u la leh khlemakor ïa la ka para nongtrei la jong. Ïa kane ka jingjia la pyntip mardor sha u Officer-in-Charge (OC) jong ka Laitumkhrah, kiba la leit ban kem noh ïa u bad la rah noh sha police station,” la ïathuh u Bah Nongtnger.
Ki Pulit ki la register case halor kane ka jingujor bad ka jingtohkit mynta ka la ïaid shakhmat.
Ka thymmei khubor ba la ïohlum ka ïathuh ba u nongshah kynnoh u la kyrpad ïa ka lanot ban ïaleit lang bad u sha Bank na ka bynta ki kam jong ka ophis bad hadien ba la wanphai na Bank, la kynnoh ba u Sharma u la ïalam ïa ka lanot sha ka ingsah jong u da kaba aidaw ban leit shim ïa ka tiphin ja jong u bad la kynnoh ba dei ha kane ka por ba u la pyrshang ban jrong kti ïa ka.
