Shillong, Nailur, 09: Ki nongñiah kali kamai Tourist kiba don hapoh ka shatri jong ka All Khasi Meghalaya Tourist Taxis Association (AKMTTA) ki la pynlong ïa ka jingïakhih da kaba teh lama iong ïa baroh ki kali kamai Tourist kiba don ha nongbah sor Shillong.
Kane ka jingïakhih ka long ban pynbor ïa ka Sorkar Jylla ba kan shim ïa ki lad ki lynti ban pyrkhing ïa baroh ki kali kamai kiba nabar jong ka jylla ban leit buh briew sha ki jaka jngohkai kiba don ha kylleng ka jylla Meghalaya.
Ka jingdawa jong ki, ka long ruh ban pynbor ïa ka Sorkar Jylla ba ka dei ban bat ïa ki kali kamai Tourist ha kano kano ka jaka bad ban ailad pat ïa ki kali kamai na kane ka jylla Meghalaya ban kit ïa ki briew sha ki jaka jngohkai.
U President ka Association u Bah Ricaldinus Dohling ha ka jingïakren bad ki lad pathai khubor ula ong ba lada ka Sorkar Jylla ka kloi ban sumar ïa ki phlang ha JN Complex ha Polo bad ban khot ïa ki nongrwai kiba nabar ka ri, balei kam kloi ban peit lem ïa ki jingeh jong ki nongñiah kali kamai kiba dei ki trai muluk jong kane ka jylla.
U la ong shuh shuh, lada ka Sorkar kam sngap ïa kane ka jingïakhih kaba jai jai, ka seng kan sa shim da kiwei pat ki lad ki lynti.
