Shillong, Nailur, 12: Ka Hynñiewtrep Youths Council (HYC) ha ka step Sngi Palei ba la lamkhmat da u President u Bah Roykupar Synrem ki la tur kyndit ban pynlong ïa ka jingrah plakad hakhmat ka Shillong Press Club (SPC) ha Lachaumiere, Shillong hadien ba ki la ïoh jingtip ba kawei ka kynhun jong ka Niam Hindu kaba la tip kum ka Jagatguru Shankaracharya Swami Avikukteshwarananda Saraswati Ji Maharaj ka la thmu ban ai jingpyntip lyngba ki lad pathai khubor ha ka por 1:00 baje noh sngi.
Kane ka kynhun lyngba u National Media Incharge u Shailendra Yogiraj Sarkar ka la pyntip sha ki lad pathai khubor ba kan ai jingkren ha Shillong Press Club ha ka por 1:00 baje nohphai sngi hynrei kim shym la batai bniah halor kano ka mat ba kin kren.
Kane ka kynhun jong ka Niam Hindu tang shu ïoh jingtip ïa ka jingtur jong ki dkhot ka HYC ki la pynsangeh noh ïa ka jingïalang ban ai jingkren lyngba ki lad pathai khubor da kaba teipop kylla ba ki bor ba dei peit jong ka Shillong Press Club kim shym la ai jubab wat hadien ba kum ka kynhun ki la pan da ka jingthoh ban pynlong ïa ka jingïalang bad ki lad pathai khubor.
Ha kaba ïadei bad kane, ka Shillong Press Club ha u kyrwoh ka la pynshai ba dei u Bramachari Mukundanand uba la phah jingpynsangeh noh ïa ka jingïakynduh bad ki lad pathai khubor ha ka minit ba khatduh, ym ka Shillong Press Club.
Hynrei ka HYC kaba la ïoh jingtip ïa ka mat ba kane ka kynhun kan kren na ka bynta ban pynlong ïa ka Yatra lane ban ïaid rally ban pyrshah ïa ka jingbam doh masi, marmar ki dkhot ka HYC ki la tur sha Shillong Press Club.
Ki Pulit kiba la ïoh jingtip ïa ka jingtur kyndit ki dkhot ka HYC ki la syrtap ïa ka phalor jong ka Shillong Press Club ban ym ailad ïa ki dkhot ka HYC ba kin pynwit ïa ka jingthmu jong ka seng Niam Hindu ban kren sha ki lad pathai khubor.
Katba ki Pulit ki dang ieng pahara hakhmat jong ka Shillong Press Club ki dkhot ka HYC kiba la rah da ki plakad ki la pyrta ruh ïa ki sur jingpynrem.
Ha ka jingïakren bad ki lad pathai khubor u Bah Synrem u la ong ba ka HYC ka kren da kaba shai ba kan ieng pyrshah lada kino kino ki kynhun kiba pyrshah bam ïa ka doh masi ki ïaid shakhmat ïa ka jingthmu jong ki ban pynlong ïa ka Yatra ha nongbah Shillong.
U nongïalam ka HYC u la ong ba ka jingtur jong ka HYC sha Shillong Press Club ka dei ka dak ban pyni ba ki la pyrshah lypa ïa ka jingthmu ïaid Yatra da ki kynhun Niam Hindu ha ka 2 tarik Risaw, 2024.
