Shillong, Nailur, 25: Ka kynhun jong ki nongïalam ka Harijan Panchayat Committee (HPC) ba la synran lang da ki nongïalam jong ka Shiromani Gurdwara Parbandhak Committee (SGPC) ha ka sngi Balang ki la leit ban ïakynduh ïa u Chief Secretary jong ka Jylla u Bah Donald P. Wahlang ban bteng ïa ka jingïakren ha kaba ïadei bad ka jingpynkynriah ïa ki 342 tylli ki longiing na Them Ïew Mawlong.
Kine ki ar tylli ki kynhun ki la pynpaw ïa ka jingsngewskhem ba shen yn sa lah ban weng ïa ki jingeh ynda ka sorkar ka la pyntreikam ïa ki jingdawa.
Ïa kane ka jingïalang la pynlong da ka jingbthah jong ka Sorkar Jylla ïa u Chief Secretary ba un phah ïa ka kaiphod halor ka jingïakren kaba mih na ka jingïalang (ha kaba ïadei bad ka rai jong ka HPC halor ka Blueprint ba la pynkhreh da ka sorkar na ka bynta ka jingpynkynriah) shwa ban shim ïa ka rai ba khatduh halor kane ka kam.
Ha ka jingïakren bad ki lad pathai khubor, u nongïalam jong ka SGPC u Jagmohan Singh u la ong, “ngi la don ka jingïakren kaba seisoh bad ngi kyrmen skhem ba ïa ki jingeh jong ki briew kiba sah ha Punjabi Lane yn sa lah ban pynbeit noh kham kloi.”
U la ong ba kane ka mat ka dei ruh kaba sngewkhia na ka bynta jong ki namarba ki jaidbynriew Sikh ki la mih na Punjab ban wan sha Meghalaya naduh 200 snem mynshwa bad ka SGPC ruh ka wan da kawei ka sur ban ai jingkyrshan ïa ki.
“Ngim shym la wan hangne ban thaw jingkulmar. Ngi wan hangne ban ïarap ïa ka Sorkar ban weng ïa ki jingeh da ki jingïakren pynbeit ha ka rukom kaba dei,” u la ong bad bynrap ba kum ka kynhun kam da sngewhun eh ïa ka jingïakren bad dei na kata ka daw ki la pynpaw ïa ki jingsngew khia bad kine ki dang don hapdeng ka jingïakren khnang ba yn dup lah ban pynbeit ha ka rukom kaba dei.
“Nalorkata, u Symbud Myntri Rangbah u la dep ong ba ïa kane ka kam la ieh ban peit da u Chief Secretary bad na kane ka daw ngi la wan ïakynduh ïa u Chief Secretary mynta ka sngi bad ngi dang ap ïa ka jingkhot ïakren na ka liang jong ka Sorkar,” u la ong.
Haba kylli, u Jagmohan Singh u la kyntait ban ïathuh bniah ïa ka jingïakren hynrei u la ong, “ka jingïakren ka shu long halor ka jingbteng ïa ka jingïakren ba dang sahteng. Ngi la ai ïa ki jingai jingmut bad mynta ka dang don ha ka khep bym pat lah ban kren eiei. Ngim pat lah ban ïathuh eiei sha ki lad pathai khubor ha kane ka por. “
Lah ban kdew hangne ba ka Sorkar ka la wanrah da ka Blueprint hadien ba la kyntait ïa ka jingtyrwa jong ka HPC ha ka 25 tarik, Ïaiong, 2022 ba 200 square meters ka jaka dei ban ai mar kawei pa kawei na ki 342 tylli ki longiing hapoh ka European Ward nalor kaba pynshna ruh ïa ki ing sah.
Ha ka 31 tarik, Nailar, 2022, ka Sorkar Jylla ka la pynbna ba ïa ka rai ban shna ïa ki ingsah bun mala ha ka jingheh kaba 2.5 akar ka jaka jong ka Shillong Municipal Board (SMB) ban pynkynriah ïa ki 342 tylli ki longiing.
