Shillong, Nailur, 26: Ka Director of Health Services (MI) ka Dr F.V. Kharshiing ha ka sngi Palei ka la pynpaw ïa ka jingsngew bynñiaw halor ka jingkhang ba dang shen da ki paidbah ïa ka Jongksha Community Health Centre (CHC), kaba la ktah haduh katta katta ïa ki paidbah.
Ha ka 20 tarik mynta u bnai, ki nongshong shnong jong ka shnong Jongksha ki la khang tala ïa ka CHC kum ka jingpyrshah namar ka jingbym don doktor.
Ha ka jingïakren bad ki lad pathai khubor, ka Dr. Kharshiing ka la ong ba ki doktor ki la shim shuti katkum ka hok jong ki.
“Iwei i doktor i la shim shuti kham hashwa bad sa iwei pat i doktor i la shim shuti na ka daw ka koit ka khiah. Baroh arngut ki la ai jingtip sha ki bor ba dei peit shwa ban shim shuti bad la ai jingbit ïa ki hadien ba la pynbeit ban phah da iwei i doktor na East Jaiñtia Hills iba trei ha Pynursla”.
“I doktor, iba dei ban leit sha Jongksha CHC ha ka 20 u Nailur, i la mih na Pynursla ban leit sha ka CHC ha ka 21 Nailur (hynei na ki daw bym lah kiar na ki jingjia ha ing hasem). I ladep pyntip ruh sha ka ophis DMHO. Hynrei kaba sngewsih ba ka jingkhang tala ïa ka CHC ka la khanglad ïa i ban leit sha ka kamram,” la ong ka Dr. Kharshiing.
Ka Dr. Kharshiing ka la ong ruh watla arngut ki doktor ki la shim shuti, ka ophis DM&HO ka la buh ïa uwei u doktor Ayush bad ka don ruh ka tele-consultation ban ïarap ïa ki doktor bad ïa ki nongtrei ka koit ka khiah hapoh ka CHC.
Ka la ong ba ka ophis DM&HO ha ka 20 tarik mynta u bnai ka la phah ïa uwei u doktor na Mawiong ban ïarap ïa u doktor Ayush hapoh ka CHC hynrei kaba sngewsih ka long ba ki paidbah kim shym la ailad satia ïa u doktor ban rung wat hapoh ka hospital.
Halor kane ka jingjia, ka DHS ka la ong, “ki dawai khamtam ki injekshon, kiba dei ban buh bha hapoh ka duli thah bad kiba donka bha ban khmih bniah na ka por sha ka por, miet la bad sngi. Kane ka jingkhang tala ïa ka CHC ne ïa kino kino ki jaka ai jingsumar ka long ka jingduhnong kaba khraw ïa ki nongshong shnong khamtam ïa kito kiba donkam ïa ki jingïarap ba kyrkieh.
